Ўзбекистон, Тошкент – Batafsil.uz. Урганч аэропортида божхона ходимлари ноёб тарихий ва маданий аҳамиятга эга бўлган қадимий бронза қўнғироғини республикадан ташқарига олиб чиқишга уринишнинг олдини олишган. Бу ҳақда мухбиримиз хабар бермоқда.
Хоразм вилояти Божхона бошқармаси маълумотларига кўра, узоқ хориж давлатларидан бирига кетаётган фуқаронинг қўл юкини текширишда аэропорт чегара божхона назорати ходимларида шубҳалар пайдо бўлган.
Багаж рентген мосламаси орқали текширилганда, шубҳали нарса борлиги аниқланган ва шундан сўнг божхона ходимлари фуқаронинг қўл юкини текширишган. Маълум бўлишича, фуқаро ноқонуний равишда эски бронза қўнғироғини мамлакатдан олиб чиқишга уринган.
Бадиий экспертиза хулосасига кўра, қўнғироқ XIX асрнинг иккинчи ярмида Европа мамлакатларидан бирида тайёрланган. Топилган раритет Ичан-қалъа давлат музей-қўриқхонасига топширилган.
1998 йил 29 августдаги “Маданий бойликларни олиб чиқиш ва олиб кириш тўғрисида”ги қонуннинг 8-моддасига биноан, эллик йил ва ундан кўпроқ вақт олдин яратилган маданий бойликлар республикадан ташқарига олиб чиқилмайди.
Эслатиб ўтамизки, яқинда Божхона қўмитаси қайси тангалар ва маданий бойликларни мамлакатдан эркин олиб чиқиш мумкинлигини айтган.
Изоҳлар мавжуд емас