Ўзбекистон, Тошкент - Batafsil.uz. Бугун, 9 сентябрь куни Тошкентда турли ҳудудлардан келган оғир касалланган болаларнинг ўнлаб ота-оналари Соғлиқни сақлаш вазирлиги биноси олдида тўпланди.
Уларнинг айтишича, гап тахминан 400 нафар бола ҳақида кетмоқда. Болаларда қизамиқдан кейин оғир асоратлар, жумладан, марказий асаб тизими зарарланиши ва SSPE ташхиси кузатилган.
Batafsil.uz мухбирига йиғилишда иштирок этган ота-оналардан бири 7 ёшли ўғли тахминан бир йил олдин қизамиққа қарши эмланганидан сўнг тез-тез йиқила бошлагани, кейин эса юриш ва гапириш қобилиятини бутунлай йўқотганини айтди. Жиззах вилоятидаги тиббий муассасалар ва Миллий тиббиёт марказида ўтказилган текширувлардан сўнг унга "ўткир ости склерозловчи панэнцефалит" ташхиси қўйилган. Шифокорлар буни бошдан кечирилган қизамиқ вирусининг асорати сифатида баҳолаган.
Ота-оналар вазирликдан фарзандларини зарур дори-дармонлар билан таъминлаш ва ихтисослаштирилган реабилитация хизматларини йўлга қўйишни талаб қилмоқда.
Йиғилган ота-оналар музокаралар ўтказиш учун вазирлик биносига киритилди. Журналистларни эса бинога киритишмади.
Ҳозирча вазирлик матбуот хизмати мазкур ҳолат юзасидан изоҳ бермади.
Изоҳлар мавжуд емас