Ўзбекистон, Тошкент - Batafsil.uz. Москванинг Басман суди россиялик генерал-лейтенант Игорь Кирилловнинг ўлдирилиши иши бўйича Ўзбекистоннинг икки фуқароси - Саидакбар Ғуломов ва Миржалол Одиловни сиртдан ҳибсга олди. Иккаласи ҳам халқаро қидирувга берилган. Шунингдек, Украина фуқароси Андрей Гедзик ҳам ҳибсга олинган.
Аввалроқ Россия ҳуқуқ-тартибот идоралари Ўзбекистоннинг яна бир фуқароси - Аҳмаджон (Аҳмад) Қурбоновни қўлга олган, тергов уни генерал Игорь Кирилловнинг ҳаётига зомин бўлган терактнинг эҳтимолий ижрочиси деб ҳисобламоқда.
Тергов версиясига кўра, айнан у генерал уйи яқинида электр самокатга ўрнатилган портловчи қурилмани жойлаштирган ва ҳаракатга келтирган. 2024 йил 17 декабрь куни содир бўлган портлаш оқибатида генерал-лейтенант Игорь Кириллов ва унинг ёрдамчиси майор Илья Поликарпов ҳалок бўлди.
Бундан ташқари, тергов Аҳмаджон Қурбоновга теракт содир этиш эвазига пул мукофоти ва Европа Иттифоқи мамлакатларига бориш учун ёрдам ваъда қилинган деб ҳисоблайди. Портлашдан сўнг у яширинишга уринган ва бир муддат Москва вилоятида бўлган, бироқ ФХХ ва жиноят қидирув хизмати ходимлари томонидан қўлга олинган.
Иш материаллари айбловларни тасдиқлаш учун Россия Бош прокуратурасига топширилди. Тергов маълумотларига кўра, жиноят ижрочиси умрбод қамоқ жазосига ҳукм қилиниши мумкин.
Тергов давом этмоқда, ҳуқуқ-тартибот идоралари барча алоқадорларни аниқлаш ва уларни жавобгарликка тортиш устида ишламоқда.
Изоҳлар мавжуд емас