Ўзбекистон, Тошкент - Batafsil.uz. Санкт-Петербургда ўзбекистонлик 23 ёшли ишчи ҳалок бўлди. У Россия Олий суди биносининг қурилиш майдончасида ишлаётганда 15 метр баландликдан қулаб тушган.
Шимоли-ғарбий минтақалараро меҳнат инспекцияси матбуот хизматининг маълум қилишича, 16 сентябрь куни йигит қурилиш ёғочларида иш олиб бораётган вақтида мувозанатини йўқотиб, йиқилиб тушган. У олган тан жароҳатларидан шифокорлар етиб келгунига қадар вафот этган.
Текширув марҳум ва қурилиш компанияси ўртасида расмий меҳнат шартномаси тузилмаганини кўрсатган.
Инспекция раҳбари ўринбосари Олга Казанскаянинг таъкидлашича, эҳтимолий сабаблар орасида индивидуал ҳимоя воситаларидан фойдаланмаслик, жамоавий хавфсизлик воситаларининг етишмаслиги ва баландликда ишларни қониқарсиз ташкил этиш кабилар кўриб чиқилмоқда.
Эслатиб ўтамиз, Ленинград вилоятининг Усть-Луга посёлкасида металл конструкцияларни ўрнатиш вақтида 42 ёшли Ўзбекистон фуқароси ҳалок бўлган эди. Ўшанда у суғуртасиз ишлаган, тахминан 30 метр баландликдан қулаган, кейинроқ касалхонада вафот этган.
Изоҳлар мавжуд емас