Ўзбекистон, Тошкент - Batafsil.uz. Олмазор туманидаги хусусий боғчалардан бирида беш ёшли болага нисбатан куч ишлатган тарбиячи аёл маъмурий жавобгарликка тортилди ва жаримага тортилди.
Ижтимоий тармоқларда Тошкент шаҳар Олмазор туманида жойлашган хусусий мактабгача таълим ташкилотида содир бўлган зўравонлик видеоси тарқалганди. Видеода тарбиячининг жаҳл устида ёш болани силталаб, юзига шапалоқ тушираётгани акс этган.
Кескин эътирозларга сабаб бўлган видеотасвирлар асосида туман Ички ишлар органлари фаолиятини мувофиқлаштириш бошқармаси томонидан суриштирув ишлари олиб борилган. Кузатув камералари ўрганилганда, Елена исмли тарбиячи тушлик вақтида ухламагани учун болага нисбатан куч ишлатгани, уни силталаб, юз қисмига ургани тасдиқланган.
Натижада болага тан жароҳати етказилган.
Жабрланувчининг онаси фарзанди ҳозирда шифокорлар, жумладан, психолог назоратида эканини билдирган. Тарбиячи ўз қилмишини тан олиб, боланинг ота-онаси ва суддан кечирим сўраган.
Жиноят ишлари бўйича Олмазор туман судининг қарорига кўра, ҳуқуқбузар Ўзбекистон Республикаси Маъмурий жавобгарлик тўғрисидаги кодекснинг 52-моддаси 2-қисми (Енгил тан жароҳати етказиш) билан айбдор деб топилган. Суд унга базавий ҳисоблаш миқдорининг уч баравари, яъни 1 236 000 сўм миқдорида жарима жазосини тайинлаган.
Изоҳлар мавжуд емас