Ўзбекистон, Тошкент - Batafsil.uz. Ўзбекистон терма жамоаси бош мураббийи Фабио Каннаваро терма жамоани "ўйнаш жуда қийин бўлган" рақиб деб атади. У Deportes RCN телеканалига берган интервьюсида ўзбекистонлик футболчилар характерга, матонатга эга экани ва курашсиз таслим бўлмаслигини таъкидлади.
Каннаваронинг баёноти 5 декабрь куни бўлиб ўтган жаҳон чемпионатига ташланган қуръа фонида янгради. Унга кўра, Ўзбекистон К гуруҳида Португалия, Колумбия ва қитъалараро плей-офф ғолиби (ДР Конго - Ямайка/Янги Каледония) билан ўйнайди.
"Биз мураккаб гуруҳга тушиб қолдик. Биз учун бу жаҳон чемпионатидаги илк иштирокимиз ва турнир катта тажриба бўлади. Португалия ва Колумбия каби рақибларга қарши фақат индивидуал сифатларга ишониб бўлмайди, шунинг учун биз жамоа бўлиб ишлашимиз керак", - дея қайд этди Каннаваро.
Мураббийнинг сўзларига кўра, Ўзбекистон таркиби анча ёш бўлади. Шунингдек, у тажрибали терма жамоалар учун ҳам ўзбекистонлик футболчиларга қарши ўйнаш осон эмаслигини таъкидлади.
"Жисмоний жиҳатдан европаликларга ютқазамиз, аммо ўзбекистонлик футболчилар кучли, матонатли ва ҳеч қачон таслим бўлмайди. Уругвай билан ўйинда тўққизта жароҳат олган эдик, аммо жамоа охиригача курашди. Биз 2:1 ҳисобида ютқаздик, аммо характер кўрсатдик", - деди у.
Каннаваронинг таъкидлашича, терма жамоа қўшимча ўқув-машғулот йиғинларини, жумладан, миллий чемпионат футболчилари учун ҳам ўтказишни режалаштирмоқда. Легионерларга ҳам алоҳида эътибор қаратилади.
"Инфратузилма ва инвестициялар ривожланиши керак. Лига кўплаб йўналишларда яхшиланишга муҳтож", - дея таъкидлади мураббий.
Ўзбекистон терма жамоаси турнирни Мексикадаги афсонавий “Ацтека” стадионида Колумбияга қарши ўйин билан бошлайди. Жамоа иккинчи турда Португалияга қарши майдонга тушади.
Изоҳлар мавжуд емас