Ўзбекистон, Тошкент - Batafsil.uz. Италиялик афсонавий ҳимоячи, 2006 йилги жаҳон чемпиони Фабио Каннаваро Ўзбекистон миллий терма жамоасини бошқаришга рози бўлди, деб хабар бермоқда таниқли инсайдер Фабрицио Романо.
Унинг сўзларига кўра, томонлар оғзаки келишувга эришган ва Каннаваро 2026 йилги жаҳон чемпионатида терма жамоани бошқаради. Яқин 24-48 соат ичида барча расмий жараёнлар якунланиши ва ҳужжатлар имзоланиши кутилмоқда.
2006 йилги "Олтин тўп" соҳиби Фабио Каннаваро Ўзбекистон терма жамоаси бошқарувида мураббийлик фаолиятининг янги босқичини бошлашга тайёр.
Эслатиб ўтамиз, сентябрь ойи охирида Ўзбекистон футбол ассоциацияси Италияда Каннаваро билан дастлабки музокаралар ўтказгани хабар қилинганди. Ўшанда мутахассис ўз ватанида клуб футболида ишлашни кутиш ниятида таклифни рад этгани ҳақида маълумот пайдо бўлганди. Бироқ, сўнгги маълумотларга кўра, томонлар муросага кела олган.
Маълумотларга кўра, 52 ёшли мутахассис тез орада Италиядан икки нафар мутахассисни ҳам Ўзбекистонга олиб келиши кутилмоқда. Чичо Троизе унга ёрдамчи мураббий бўлиши мумкин. Евгений Альбарелла жамоада жисмоний тайёргарлик бўйича мутахассис сифатида ишлашни режалаштирмоқда.
Каннаваронинг бош мураббий сифатидаги эҳтимолий дебюти - Ўзбекистон ва Уругвай терма жамоалари ўртасидаги ўртоқлик учрашуви 13 октябрь куни Малайзиянинг Малак шаҳридаги Ҳанг Жебат стадионида бўлиб ўтиши режалаштирилган.
Изоҳлар мавжуд емас