Ўзбекистон, Тошкент - Batafsil.uz. АҚШ Президенти Дональд Трамп Эрон расмийларини ядровий қуролдан воз кечиш бўйича янги келишув тузишга чақирди ва акс ҳолда "кескин чоралар" кўрилишидан огоҳлантирди. Теҳрон эса ҳар қандай агрессияга кучли зарба билан жавоб беришга тайёрлигини маълум қилди.
Президент Трамп ижтимоий тармоқларда Эронни "адолатли ва тенг ҳуқуқли" келишув столига келишга чақирди. Унинг таъкидлашича, Эрон ядровий қуролга эга бўлмаслиги керак ва бу борада вақт оз қолган.
Кеча АҚШнинг "USS Abraham Lincoln" авиаташувчи кемаси бошчилигидаги ҳарбий флоти ("армада") аллақачон Яқин Шарққа етиб келгани ҳақида хабар берган. Эрон атрофи ҳарбий кемалар билан ўраб олинган.
Трамп ўтган йилнинг июнь ойида амалга оширилган ҳарбий зарбаларни эслатиб, навбатдаги ҳужум "анча ёмонроқ" бўлишини таъкидлаган.
Теҳрон расмийлари АҚШнинг ушбу босимларига жавобан ўз қуролли кучлари шай ҳолатда эканини билдирган.
Эрон Олий раҳнамосининг маслаҳатчиси Али Шамхоний ҳар қандай ҳужумга жавобан АҚШ, Исроил ва уларни қўллаб-қувватловчи кучларга зарба берилишини айтган.
Ташқи ишлар вазири Аббос Арақчи Эрон тинчлик мақсадларидаги ядровий технология ҳуқуқини таъминлайдиган, лекин қўрқитиш ва таҳдидлардан холи бўлган келишувга тайёрлигини билдирган.
АҚШ Давлат котиби Марко Рубио Конгрессдаги чиқишида Эрон ҳукумати ҳозирда ҳар қачонгидан ҳам заифроқ эканини ва иқтисодиёт инқироз ёқасида турганини қайд этган. Унинг фикрича, мамлакатда иқтисодий қийинчиликлар сабабли норозилик намойишлари қайта авж олиши мумкин.
Шу билан бирга вазиятнинг кескинлашуви дунё бозорида нефть нархларига таъсир қилиши ва минтақавий хавфсизликка жиддий таҳдид солиши мумкин.
Изоҳлар мавжуд емас