Ўзбекистон, Тошкент - Batafsil.uz. Эронда мажбурий ҳижоб кийиш қоидаси бекор қилинди - энди бу ҳар бир аёлнинг шахсий танлови сифатида тан олинди. Бундай қарор қабул қилингандан сўнг, мамлакат кўчалари ва жамоат жойларида кенг кийим кийган аёлларни тобора кўпроқ кўриш мумкин.
Яқинда Эроннинг қабул қилинаётган қарорларнинг мақсадга мувофиқлиги бўйича Кенгаши аъзоси Муҳаммадризо Бахонер "Иффат тўғрисида"ги қонун энди йўқлигини маълум қилди. Унинг сўзларига кўра, бу қоида энди юридик мажбурият ҳисобланмайди.
Полицияга ҳижобсиз аёлларга нисбатан жарима ва бошқа жазолар ёки чекловлар қўлланилмаслиги ҳақида хабар берилган. Фуқаролар ҳуқуқлари бузилганлиги ҳақида ишонч телефонига хабар беришлари мумкин.
Эслатиб ўтамизки, баёнот узоқ йиллик қаршиликлардан сўнг эълон қилинди. Хусусан, 2022 йилда "ахлоқ полицияси" томонидан нотўғри ҳижоб кийгани аниқланган 22 ёшли Маҳса Амини ҳибсга олиниб, вафот этганидан кейин аёллар ҳуқуқлари учун оммавий норозилик намойишлари кучайди. Ўшанда бутун мамлакат бўйлаб аёллар кўчаларга чиқиб, бош кийимларини ечиб, сочларини олиб, "Аёл, ҳаёт, эркинлик" шиорини айтиб қичқиришганди.
Эслатиш жоизки, ўтган йили Эрон режими мамлакатда жамоат жойларида ҳижоб ўрашдан бош тортган аёлларни "даволаш" учун махсус клиникалар очмоқчи эди.
Изоҳлар мавжуд емас