Ўзбекистон, Тошкент - Batafsil.uz. АҚШ президенти Доналд Трамп Ғазодаги можаро томонлари ўртасида урушни тўхтатиш ва гаровга олинганларни озод қилишга олиб келадиган келишувга эришилиши мумкинлигини айтди.
"Бизда Ғазо бўйича келишув борга ўхшайди. Сизга хабар берамиз. Ўйлашимча, бизда келишув бор", - деди Трамп Оқ уйда журналистларга эҳтимолий келишув тафсилотларини ошкор қилмай.
Америка етакчисининг сўзларига кўра, келишув гаровга олинганларни озод қилиш ва урушни тугатишни назарда тутади. Бироқ у аниқ муддат ва шартларга аниқлик киритмаган.
Axios нашри 22 сентябрь куни Трамп араб давлатлари етакчиларига можарони тўхтатиш, гаровга олинган исроилликларни озод қилиш ва Ғазода ҲАМАС ҳаракатига алоқаси бўлмаган ҳукумат тузишга қаратилган янги режани тақдим этгани ҳақида ёзган эди. Араб давлатлари ташаббусни қўллаб-қувватлади, Исроил ва ҲАМАС эса ҳозирча уни маъқуллашдан бош тортди.
Исроил бош вазири Биньямин Нетаняху 26 сентябрь куни БМТ Бош ассамблеясида сўзлаган нутқида жанговар ҳаракатлар "барча мақсадларга эришилмагунча", жумладан, гаровга олинганларни озод қилиш ва ҲАМАСни бутунлай йўқ қилишгача давом этишини айтди. Доналд Трамп ўшанда Фаластин давлатининг тан олиниши ҲАМАС террорчилари учун "мукофот" бўлишини қўшимча қилганди.
Изоҳлар мавжуд емас