Ўзбекистон, Тошкент - Batafsil.uz. "ВКонтакте" ижтимоий тармоғи ва Telegram мессенжери асосчиси Павел Дуровнинг айтишича, у 2018 йилда эҳтимолий заҳарлантиришга дуч келган. Бу ҳақда у подкастер Лекс Фридманга берган интервьюсида сўзлаб берди.
Дуровнинг таъкидлашича, воқеа 2018 йил баҳорида содир бўлган. Ўшанда у TON блокчейн-лойиҳа учун маблағ топиш билан шуғулланаётган ва бир неча давлатлар Telegram мессенжерини блоклашга уринган эди. У ўша вақтда ижарага олинган таунхаусда ёлғиз яшаган, аммо қайси мамлакатда эканини аниқламаган.
Унинг сўзларига кўра, қўшниси “ғайриоддий” бўлган ва бир куни уй эшиги олдида “нимадир” қолдирган. Дуров уйга қайтганидан тахминан бир соат ўтиб, ўзини кескин ёмон ҳис қилган.
"Мен бутун танада оғриқ ҳис қилдим. Туриб, ювиниш хонасига боришга уриндим. Лекин боргунча тана ҳаракатдан тўхтай бошлади. Аввал кўриш ва эшитиш йўқолди, сўнг нафас олиш қийинлашди. Ҳаммаси кучли оғриқ билан кечди. Юрак, ошқозон, барча томирлар. Буни тушунтириш қийин эди, аммо бир нарсага ишончим комил эди: 'Мана ҳаммаси тугади'. Эрталаб полда ҳушимга келдим. Туролмадим, жуда кучли заифлик бор эди. Бутун танада томирлар ёрилиб кетганди. Менда бундай ҳолат ҳеч қачон бўлмаган. Кейин икки ҳафта юра олмагандим", — деди Дуров.
У шунингдек, воқеа ҳақида на ўз жамоасига хабар берган ва на оммавий равишда сўзлаб чиққан. "аммо бу жуда оғир бўлган. Чунки унгача ҳеч қачон касал бўлмаганман. Соғлигим идеал эди", — дея қўшимча қилди Telegram асосчиси.
Шу билан бирга, Дуров эҳтимолий заҳарланишда кимни гумон қилаётганини очиқламаган.
Изоҳлар мавжуд емас