Ўзбекистон, Тошкент - Batafsil.uz. Рим папаси АҚШ Президенти Дональд Трамп ва Пентагон раҳбариятининг сиёсатини кескин танқид қилиб, урушларни диний нуқтаи назардан оқлашга уринишларни қоралади. Христиан дини етакчиси Лев XIV Ватикандаги Авлиё Пётр майдонида қилган чиқишида уруш оловларини ёқаётган ва "қўли қонга ботган" сиёсий етакчиларнинг дуоларини Худо эшитмаслигини таъкидлади.
Бу баёнот АҚШ ва Исроилнинг Эронга қарши ҳарбий амалиётлари ҳамда Пентагоннинг қуруқликдаги операцияга тайёргарлиги фонида янграган. Асли келиб чиқиши америкалик бўлган биринчи понтифик — Папа Лев Исо Масиҳ "тинчлик подшоҳи" эканини ва унинг номи Эрон, Исроил ҳамда АҚШ ўртасидаги қуролли тўқнашувларни оқлаш учун ишлатилиши мумкин эмаслигини қайд этган.
Рим папасининг ушбу муносабати АҚШ Мудофаа вазири Пит Хегсетнинг ўтган ҳафтадаги баёнотига жавоб сифатида баҳоланмоқда. Ўшанда Хегсет "шафқатга лойиқ бўлмаган" душманларга нисбатан зўравонлик ишлатишга чақириб, христиан миллатчилиги ғояларини илгари сурган эди.
Президент Дональд Трамп душанба куни берган баёнотида эса Хегсетнинг позициясини қўллаб-қувватлаб, ҳарбий амалиётларни бошлаш масаласи муҳокама қилинганда айнан Пентагон раҳбари биринчи бўлиб "келинг, буни амалга оширайлик" деб чиққанини тасдиқлаган.
The Guardian нашрининг ёзишича, понтифик Исо Масиҳ ҳатто ҳибсга олинган пайтида ҳам зўравонликни рад этганини эслатиб, ҳозирги ҳарбий ҳаракатларга диний тус беришга уринишларни кескин рад этган.
Эслатиб ўтамиз, 28 март, шанба куни Америка Қўшма Штатларининг деярли барча йирик шаҳарларида президент Дональд Трамп маъмуриятига қарши қаратилган кенг кўламли "No Kings" ("Қироллар керак эмас") намойишлари бўлиб ўтди. Ташкилотчиларнинг дастлабки ҳисоб-китобларига кўра, акцияларда 8 миллиондан ортиқ киши иштирок этган бўлиб, бу октябрь ойидаги кўрсаткичлардан (7 миллион) ҳам юқори натижадир.
Изоҳлар мавжуд емас