Ўзбекистон, Тошкент - Batafsil.uz. АҚШ Эрон билан ҳамкорликни давом эттираётган барча давлатларга нисбатан қатъий савдо чораларини жорий қилмоқда. Президент Дональд Трамп бундан буён Эрон билан бизнес олиб бораётган ҳар қандай давлат Қўшма Штатлар билан барча савдо операциялари учун 25 фоиз бож тўлашга мажбур бўлишини айтди.
Бу ҳақда Трамп Truth Social ижтимоий тармоғида маълум қилди. Унинг сўзларига кўра, фармон дарҳол кучга киради ва ҳеч қандай истиснолар ёки шикоят қилиш механизмларини назарда тутмайди.
Bloomberg агентлиги маълумотларига кўра, Эроннинг асосий савдо ҳамкорлари орасида Ҳиндистон, Хитой ва Туркия бор. Айнан шу давлатлар биринчи навбатда янги қарор оқибатларига дуч келиши мумкин, чунки уларнинг АҚШ билан савдо алоқалари тўғридан-тўғри таъсир остида қолиши мумкин.
Эрон билан ҳамкорлик қилаётган мамлакатларга қарши савдо чоралари қаттиқ сиёсий баёнотлар билан бирга олиб борилмоқда. Аввалроқ Трамп Оқ уй ва АҚШ ҳарбийлари Эрондаги намойишчиларни қўллаб-қувватлашнинг эҳтимолий вариантларини таҳлил қилаётганини маълум қилганди. Унинг сўзларига кўра, ҳарбийлар вазиятни ўрганмоқда, маъмурият эса бир қатор жуда қаттиқ сценарийларни кўриб чиқмоқда. Шу билан бирга, у Эрон мухолифати етакчилари билан алоқада эканлигини таъкидлади.
Президент матбуот котиби Керолин Ливиттнинг тасдиқлашича, Трамп норозилик намойишлари шафқатсизларча бостирилгани сабабли Эронга қарши ҳар қандай чораларни кўриб чиқмоқда, жумладан, ҳаво ҳужумлари эҳтимоли ҳам бор. Бироқ, унинг сўзларига кўра, президент учун асосий ва биринчи вариант ҳали ҳам дипломатия бўлиб қолмоқда.
Эслатиб ўтамизки, Эронда 28 декабрдан буён миллий валютанинг кескин қулаши ва юқори инфляция сабабли бошланган кенг кўламли норозилик намойишлари давом этмоқда. Биринчи бўлиб Теҳрондаги Катта бозор савдогарлари иш ташлади, шундан сўнг норозилик намойишлари мамлакатнинг аксарият ҳудудларига тарқалди.
Камида 544 киши ҳалок бўлган. Қурбонлар орасида 496 нафар намойишчи ва 48 нафар хавфсизлик кучлари аъзоси бор. 10,6 мингдан ортиқ киши қўлга олинган. Шу билан бирга, қурбонлар сони ортиши мумкин. Мамлакатда интернет ва телефон алоқаси узилган, бу эса вазиятни ташқаридан баҳолашни қийинлаштиради.
Изоҳлар мавжуд емас