Ўзбекистон, Тошкент - Batafsil.uz. Дональд Трамп маъмурияти 2026 йил январидан бошлаб АҚШнинг хориждаги ваколатхоналарида элчи ва юқори мартабали ходим бўлиб ишлаган 29 нафар дипломатни чақириб олади.
Бўлажак ўзгаришлар ҳақида Associated Press ва The Guardian нашрлари Давлат департаментидаги манбаларига таяниб хабар бермоқда. Уларнинг маълумотларига кўра, ўтган ҳафтада камида 29 мамлакатдаги дипломатик ваколатхоналар вакиллари келгуси ойда ўз ваколатлари муддати тугаши ҳақида хабарнома олган.
Кенг кўламли чақирув АҚШнинг дунёнинг барча минтақаларидаги ваколатхоналарига таъсир қилади. Энг кўп ўзгаришлар Африка давлатлари, жумладан, Сомали, Сенегал ва Руандага тўғри келади - 13 нафар. Шунингдек, Осиё-Тинч океани минтақасининг олтита давлати (жумладан, Ветнам ва Филиппин) ва Европанинг тўрт давлати - Арманистон, Словакия, Черногория ва Шимолий Македониядаги миссиялар раҳбарлари чақириб олинади. Бундан ташқари, кадрлар ўзгариши Миср, Жазоир, Гватемала ва Шри-Ланкага тааллуқли бўлади.
Чақириб олинадиган барча дипломатлар Джо Байден президентлиги даврида тайинланган.
Politico нашрининг таъкидлашича, айнан дипломатик хизмат ходимларига таъсир ўтказиш қарори Америка сиёсати учун ноодатий ҳисобланади. Янги президентлар ҳар доим "сиёсий" элчиларни алмаштиришига қарамай, профессионал дипломатларга анъанавий равишда уларнинг холислиги ва Оқ уйнинг ҳар қандай раҳбарининг буйруқларини бажаришга тайёрлигига таяниб, муддатни якунлашга рухсат берилади.
Шу билан бирга, Давлат департаменти мутахассисларни тизимдан бўшатиш ҳақида гап кетмаётганини таъкидлади. Вашингтонга қайтгач, чақириб олинган ходимлар давлат аппаратида бошқа лавозимларда ишлашни давом эттиришлари мумкин бўлади.
Изоҳлар мавжуд емас