Ўзбекистон, Тошкент - Batafsil.uz. Ўзбекистон Эроннинг жануби-шарқидаги Чобаҳор портидан Ҳиндистон билан савдо-сотиқни ташкил этиш учун фойдаланиш ниятида.
Ушбу қарор 9 сентябрь куни Теҳронда бўлиб ўтган Ўзбекистон, Эрон ва Ҳиндистон ташқи ишлар вазирларининг биринчи уч томонлама учрашувида қабул қилинган.
Томонлар иқтисодий ҳамкорликни кенгайтириш ва мамлакатлар ўртасидаги транспорт боғлиқлигини мустаҳкамлаш масалаларини муҳокама қилган. Ҳиндистон, Эрон ва Ўзбекистон ўртасида юк ташишни соддалаштириш ва тезлаштириш учун стратегик тугун сифатида қаралаётган Чобаҳор портига алоҳида эътибор қаратилган. Портдан фойдаланиш товарларни етказиб бериш муддатларини қисқартириш ва транспорт харажатларини камайтириш, шунингдек, минтақавий савдо учун янги имкониятлар очиш имконини беради.
Иқтисодий масалалардан ташқари, мамлакатлар терроризм ва экстремизмга қарши кураш бўйича қўшма механизм яратишга келишиб олган. Ушбу қадам минтақада хавфсизликни мустаҳкамлаш ва таҳдидларнинг олдини олиш бўйича қўшма ҳаракатлар самарадорлигини оширишга қаратилган.
Учрашувда Ҳиндистонни Россия ва Евроосиёнинг бошқа давлатлари билан боғлайдиган "Шимол - Жануб" халқаро транзит йўлаги (INSTC) истиқболлари ҳам муҳокама қилинган. Иштирокчилар ушбу йўлакни ривожлантириш анъанавий йўналишларга муқобил бўлишини, ташувларни тезлаштириш ва уларни янада тежамкор қилиш имконини беришини алоҳида таъкидладилар.
Томонлар 2024 йил ноябрь ойида Мумбайда ташкил этилган Чабаҳар бўйича ишчи гуруҳ қарорларини жадал амалга ошириш муҳимлигини қайд этиб, савдо, логистика ва хавфсизлик соҳаларида қўшма лойиҳалар устида ишлашни фаоллаштиришга келишиб олган.
Эслатиб ўтамизки, Ҳиндистоннинг етакчи клиникаларидан бири Андижон вилоятида замонавий кўп тармоқли ихтисослаштирилган тиббиёт маркази қуришни режалаштирмоқда.
Изоҳлар мавжуд емас