Ўзбекистон, Тошкент - Batafsil.uz. 2025 йилда Ўзбекистонда аҳоли орасида инвестицион олтинга бўлган қизиқиш мисли кўрилмаган даражада ошди. Марказий банк маълумотларига кўра, ўтган ўн икки ой давомида тижорат банклари томонидан умумий оғирлиги 661 кг бўлган 33 939 дона олтин қуймаси сотилган. Бу кўрсаткич сўнгги беш йилдаги жами савдо ҳажмидан ҳам юқори бўлди.
Таққослаш учун: 2020 йил ноябридан 2025 йил декабригача бўлган даврда республика аҳолисига жами 1,2 тонна оғирликдаги 65 150 дона қуйма сотилган. Шу тариқа, умумий сотилган олтиннинг ярмидан кўпи айнан ўтган йил ҳиссасига тўғри келган. Фуқаролар орасида энг катта талаб 5 ва 10 граммлик ихчам қуймаларга тўғри келиб, улар барча операцияларнинг 60 фоиздан ортиғини ташкил этган. 2025 йилдан бошлаб бозорга 100 граммлик қуймалар ҳам чиқарилиб, мавжуд инвестиция воситалари қаторини кенгайтирди.
Регулятор ушбу активнинг юқори ликвидлилигини қайд этмоқда: 2020–2025 йиллар давомида банклар аҳолидан умумий оғирлиги 201 кг бўлган 11 828 дона қуймани қайта сотиб олган. Барча қуймалар махсус ҳимоя қадоқларида тақдим этилади, улар QR-код, уникал серия рақами ва замонавий ҳимоя элементлари билан жиҳозланган. Бу эса қимматбаҳо металлнинг ҳаққонийлигини кафолатлайди ва қайта сотиш жараёнини енгиллаштиради.
Рақамлаштириш жараёни қимматбаҳо металлар бозорига ҳам таъсир кўрсатди. 2025 йилдан бошлаб ўзбек банкларининг мобил иловаларида олтинни масофадан туриб сотиб олиш, сотиш ва сақлаш имкониятлари пайдо бўлди. Шунингдек, электрон металл ҳисобварақлари механизми жорий этилди. У орқали 0,1 граммдан бошлаб микдорларда олтинга сармоя киритиш мумкин бўлиб, бу ҳимоя активларини кенг аҳоли қатламлари учун янада оммабоп қилди.
Изоҳлар мавжуд емас