Ўзбекистон, Тошкент - Batafsil.uz. Ўзбекистонлик хонанда Жалолиддин Аҳмадалиевнинг Красноярск ўлкасидаги концерти маҳаллий ҳокимият билан келишилмаган. Ўзбекистоннинг Новосибирскдаги Бош консулхонасидан маълум қилишларича, айнан шу омил хавфсизлик кучларининг рейд ўтказишига сабаб бўлган, улар намойишни тўхтатиб, юзлаб меҳмонларни текширган.
Консуллик маълумотларига кўра, Солонцы қишлоғидаги концерт хусусий тарзда ташкил этилган ва бундай тадбирлар учун мўлжалланмаган банкет залида бўлиб ўтган. Аҳмадалиевнинг аввалроқ Новосибирскда бўлиб ўтган, шаҳар ҳокимияти билан келишилган ва тинч ўтган концертидан фарқли ўлароқ, Красноярскда ҳаммаси бошқача кечган.
Аввалроқ тадбирда ИИВ, ФХХ ва Росгвардия ходимлари иштирок этгани хабар қилинганди. Текширувдан 620 киши ўтказилди, улардан 210 нафари хорижликлар. Тақиқланган буюм ва моддалар топилмади, бироқ 26 киши, жумладан, Россияда ноқонуний бўлган саккиз нафар Ўзбекистон фуқароси полицияга олиб кетилган. Улардан 4 нафари жаримага тортилиб, чиқариб юборилган, яна 4 нафари вақтинча сақлаш марказига жойлаштирилган.
Қолганларига нисбатан 19 та маъмурий баённома расмийлаштирилган, чет элликларни ноқонуний рўйхатга олиш бўйича учта жиноий иш қўзғатилган.
Ўзбекистон Бош консулхонаси ватандошларга ҳуқуқий ёрдам кўрсатаётганини маълум қилди, шунингдек, хавфсизлик кучларининг хатти-ҳаракатларига ҳуқуқий баҳо бериш учун барча зарур ҳужжатларни Красноярск ўлкасининг ваколатли органларига юборган.
Эслатиб ўтамиз, воқеа ижтимоий тармоқларда шов-шувга сабаб бўлди. Собиқ депутат Расул Кушербаев россиялик ҳуқуқ-тартибот идоралари ходимларининг хатти-ҳаракатларини ўзбекистонликларни камситувчи ва таҳқирловчи деб атади.
Ўзбекистон Миграция агентлиги қўлга олинганларга адвокат юборди ва вазият Россия қонунчилиги доирасида ўрганилаётганини таъкидлади.
Изоҳлар мавжуд емас