Ўзбекистон, Тошкент - Batafsil.uz. "Ўзбекнефтгаз" компанияси бошқаруви раиси Абдуғани Сангинов раислигида ўтган йиғилишда "Нефтгазмонтаж" корхонасидаги тизимли муаммолар кескин танқид қилиниб, бир қатор раҳбарлар эгаллаб турган лавозимидан озод этилди. Корхонада кузатилган уруғ-аймоқчилик, молиявий интизомсизлик ва ишчиларга ноябрь ойидан буён ойлик тўланмаётгани кадрлар алмашинувига асосий сабаб бўлган.
Йиғилиш якунларига кўра, манфаатлар тўқнашувига йўл қўйган ва молиявий камчиликларнинг олдини олмаган комплаенс-инспектор, шунингдек, иқтисод ва қурилиш масалалари бўйича директор ўринбосарлари лавозимидан бўшатилган. Корхона директорига эса уч ойлик синов муддати тайинланиб, вазифасидан озод этилган. Раҳбарият зиммасига ишчиларнинг тўпланиб қолган иш ҳақи қарздорлигини бир ҳафта муддатда тўлиқ бартараф этиш вазифаси юкланган.
Маълум қилинишича, "Нефтгазмонтаж" фаолиятида рақамлаштириш тизими жорий этилмагани ва эскирган бошқарув усулларидан фойдаланилгани оқибатида қурилиш ишлари ҳажми 21,4 фоизга камайган. Шу билан бирга, омборлардаги моддий-техника ресурслари захираси асоссиз равишда 129 фоизга ортиб кетган. Техник паркнинг аҳволи ҳам аянчли ҳолатда: 562 та техниканинг ярмидан кўпи соз эмас, 128 таси эса бутунлай яроқсиз бўлиб, узоқ йиллар давомида таъмирланмаган. GPS-назорат тизимининг йўқлиги эса транспорт воситалари устидан назоратни сусайтирган.
Корхонада қариндош-уруғчилик тизимли тус олгани кадрлар сиёсатидаги адолат мезонларини бузиб, малакали мутахассисларнинг ишдан кетишига сабаб бўлган. Вазиятни соғломлаштириш мақсадида самарасиз активларни аукционга чиқариш, электрон ҳужжат айланиши ва ғазначилик тизимини жорий этиш, шунингдек, иш ҳажмини 10 баробарга ошириш бўйича топшириқлар берилган. Келгусида ходимлар сонини оптималлаштириш ва иш ҳақи миқдорини қайта кўриб чиқиш режалаштирилган.
Январь ойида Ўзбекнефтгаз бошқарув раиси Абдуғани Сангинов нефть базалари фаолиятидаги тизимли муаммолар ва улкан қарздорлик сабабли соҳада "Долзарб 100 кунлик" доирасида "фавқуллода ҳолат" эълон қилган эди. Кейинчалик дастурининг дастлабки 50 кунлигида ишлаб чиқариш ҳажмининг ўсиши, харажатларнинг 1,1 триллион сўмга қисқартирилиши ҳамда Uzbekistan GTL заводида синтетик маҳсулотлар ишлаб чиқариш кўрсаткичининг 318 фоизга етгани қайд этилган эди.
Изоҳлар мавжуд емас