Ўзбекистон, Тошкент - Batafsil.uz. Куни кеча Ўзбекистон Экология ва иқлим ўзгариши миллий қўмитаси расмий сайтида Олмалиқ кон-металлургия комбинатидаги текширувлар ҳақида маълумот пайдо бўлди. Маълум қилинишича, Экология полицияси хавфли чиқиндиларни ноқонуний сақлаш, шунингдек, тозаланмаган оқова сувларни дарёга оқизиш ҳолатларини аниқлаган. Текширув натижасига кўра, корхонага 48 миллиард сўм миқдорида компенсация тўлови белгиланган.
Бунга жавобан комбинат матбуот хизмати расмий баёнот бериб, корхонанинг экология соҳасидаги фаолияти бўйича ўз ҳисоботини тақдим этди.
Баёнотда "Олмалиқ КМК" АЖ экологик хавфсизлик учун ўз масъулиятини чуқур англаши ва экологик назорат идоралари тавсияларига жиддий ёндашиши таъкидланган. Қайд этилишича, ОКМК ўнлаб йиллар давомида рангли ва қимматбаҳо металлар ишлаб чиқаришни таъминлаб келаётган ҳамда экологик хавфсизлик учун ўз масъулиятини англаган мамлакатнинг стратегик корхонасидир.
Жорий йилда ўтказилган текширувлар натижаларига кўра, корхона Экология ва иқлим ўзгариши миллий қўмитаси билан биргаликда атроф-муҳитни муҳофаза қилиш бўйича комплекс чора-тадбирларни ишлаб чиқмоқда. Таркибида қимматбаҳо металлар, мис ва рух бўлган техноген чиқиндиларни қайта ишлашга алоҳида эътибор қаратилмоқда. Хорижий корхоналар билан шартномалар тузилган бўлиб, бу нафақат чиқиндиларни хавфсиз равишда утилизация қилиш, балки улардан қимматбаҳо компонентларни ажратиб олиш имконини беради.
Бундан ташқари, Ангрен кон бошқармасида тозалаш иншоотларини модернизация қилиш лойиҳалари амалга оширилмоқда. Финляндиянинг "EPSE Oy" компанияси билан биргаликда саноат оқова сувларини тозалаш бўйича тажриба лойиҳаси амалга оширилган ва тозалаш тизимларини реконструкция қилиш режаси ишлаб чиқилган бўлиб, бу тозалаш самарадорлигини ошириши керак.
Якунда комбинат экология масалаларига корхонанинг барқарор ривожланиши асоси сифатида қаралиши ва раҳбариятнинг диққат марказида бўлишини маълум қилди.
Аввалроқ, Олмалиқ кон-металлургия комбинати сунъий интеллект технологияларидан фойдаланган ҳолда ишлаб чиқаришни бошқаришнинг прогностик моделига ўтаётгани ҳақида хабар берилган эди.
Изоҳлар мавжуд емас