Ўзбекистон, Тошкент - Batafsil.uz. Ўзбекистон Президенти Шавкат Мирзиёев 2026 йил 13 март куни ўтказилган видеоселектор йиғилишида аҳоли мурожаатлари билан ишлаш тизимидаги камчиликларни танқид қилиб, ички ишлар тизимидаги муаммоларга алоҳида тўхталди. Давлат раҳбарининг таъкидлашича, ўтган йил давомида ички ишлар идоралари ваколатига кирувчи масалалар бўйича 148 мингта мурожаат келиб тушган бўлиб, уларнинг аксарияти ходимларнинг қўпол муомаласи ва тергов сифатининг пастлиги билан боғлиқ.
Йиғилишда мурожаатлар сони энг юқори бўлган ҳудудлар, хусусан, Денов ва Ургут туманлари, шунингдек, Самарқанд, Қарши, Наманган, Жиззах, Фарғона ҳамда Чирчиқ шаҳарлари тизим масъуллари учун асосий диққат марказида бўлиши кераклиги белгиланди. Соҳа раҳбарларига ушбу ҳудудларга бевосита бориб, профилактика инспекторлари ва терговчиларнинг касбий ҳамда муомала маданиятини ошириш бўйича ўқитиш ишларини ташкил этиш топширилган.
Бундан ташқари, президент туғилганлик тўғрисидаги гувоҳномани расмийлаштиришдаги бюрократик тўсиқларни танқид қилган. Маълум қилинишича, 448 нафар фуқаро ушбу ҳужжатни олишдаги қийинчиликлар бўйича шикоят қилган. Давлат раҳбари ушбу масала болаларни боғча ва мактабга жойлаштиришда жиддий муаммо туғдираётганини таъкидлаб, Адлия вазирлигига гувоҳномаларни расмийлаштиришнинг соддалаштирилган тартибини ишлаб чиқиш вазифасини юклаган.
Изоҳлар мавжуд емас