Ўзбекистон, Тошкент - Batafsil.uz. Сешанба куни Шота Руставели кўчасида яна автотранспорт ҳаракати йўлга қўйилди. Шаҳрисабз кўчасидан Чўпон ота кўчасигача бўлган ҳудуддан ўтиш мумкин.
Эслатиб ўтамиз, Шота Руставели шаҳарнинг асосий магистралларидан бири ҳисобланади. Июль ойидан бошлаб у босқичма-босқич ёпилганди, август ойидан бошлаб эса ҳаракат деярли тўлиқ ёпилган. Оқибатда қўшни кўчаларга қўшимча юклама тушган.
Ҳокимиятнинг аниқлик киритишича, очилиш техник хусусиятга эга: йўлда ҳали ҳам техниклар ва мутахассислар ишламоқда. Участкада коммунал тизимлари ётқизилган, маҳаллалардан чиқиш ва кириш йўллари ташкил этилган, автобус бекатлари тўсиқ билан ўралган. Вақтинчалик белгилар қўйилган, светофорлар одатдаги режимда ишламоқда, ёритиш қисман ёқилган.
Айни пайтда Чўпон ота кўчасидан Янги Сергели кўчасигача бўлган ҳудуд ёпиқлигича қолмоқда - у ерда асосий қурилиш ишлари олиб борилмоқда.
Шота Руставели кўчасини реконструкция қилиш 1 июнь куни бошланган бўлиб, у Миробод кўчаси билан чорраҳадан Чоштепа чорраҳасигача бўлган 6,5 километр йўлни қамраб олади. Лойиҳада йўл қопламаси, пиёдалар йўлакларини янгилаш, янги бекатлар ўрнатиш ва жамоат транспорти учун алоҳида чизиқ ажратиш кўзда тутилган.
Изоҳлар мавжуд емас