Ўзбекистон, Тошкент - Batafsil.uz. UzAuto Motors тез орада саккизта янги автомобиль моделини тақдим этади ва бу борада асосий эътибор СУВ сегментида моделлар қаторини кенгайтиришга қаратилган.
"Бугунги кунда корхонанинг ишлаб чиқариш қуввати йилига 550 минг автомобилни ташкил этади. 2025 йилда 23 мингта машина экспортга йўналтирилган. Компания янги хорижий бозорлар - Мўғулистон ва Грузияга чиқишни режалаштирмоқда", - деди компания бош директори Янош Ковач.
Хорижий брендлар томонидан тобора кучайиб бораётган рақобат шароитида UzAuto Motors моделлар қаторини янгилаб, харидорларга қўшимча қулайликлар яратмоқда. Масалан, энг харидоргир Cobalt модели модернизация қилинмоқда, Хоразмда эса кичик тижорат автомобилини ишлаб чиқариш устида иш олиб борилмоқда.
Мижозлар учун компания имтиёзли кредитлаш дастурини ишга туширди. UzAuto Motors сотувлар ва автосервис бўйича директори Вадим Артамоновнинг таъкидлашича, банк фоиз ставкаларининг бир қисмини компаниянинг ўзи қоплайди. Ҳозирда дастурда бешта банк иштирок этмоқда, бироқ уларнинг сонини кўпайтириш режалаштирилган.
Яна бир йўналиш - маҳаллийлаштиришнинг ўсиб бориши. Ҳозир автомобиль қисмларининг 58 фоизи Ўзбекистонда ишлаб чиқарилмоқда. Уч йил ичида бу кўрсаткични 80 фоизга етказиш режалаштирилган.
Эслатиб ўтамизки, 2025 йилнинг биринчи ярмида UzAuto Motors фойдаси сезиларли даражада пастлаган. Компаниянинг соф фойдаси 27,5 фоизга - 1,91 триллион сўмдан 1,38 триллион сўмга, ички бозордаги улуши эса 90,2 фоиздан 82,2 фоизга камайган.
Изоҳлар мавжуд емас