Ўзбекистон, Тошкент - Batafsil.uz. ИИВ автомобилларни давлат рўйхатидан чиқармасдан утилизация қилиш ва қисмларга ажратиш учун жарималар жорий этишни таклиф қилган. Юзлаб ҳолатларда утилизация қилинган автомобилларнинг рақам белгилари ҳуқуқбузарлик ва жиноятларда фойдаланилган.
Бу ҳақда Маъмурий жавобгарлик тўғрисидаги кодексга ўзгартиришлар лойиҳасида келтирилган.
Хусусан, рўйхатдан ўтказиш гувоҳномаси ва давлат рақами белгиларини топширмасдан автомобилни утилизация қилганлик ёки қисмларга ажратганлик учун жисмоний шахсларга базавий ҳисоблаш миқдорининг 5 баравари (2 млн сўмга яқин) миқдорида, мансабдор шахсларга эса базавий ҳисоблаш миқдорининг 10 баравари (4 млн сўмдан сал кўпроқ) миқдорида жарима солиш таклиф этилмоқда.
Вазирлик маълумотларига кўра, 2024 йилнинг ўзида Йўл ҳаракати хавфсизлиги хизмати томонидан ҳисобдан чиқарилмаган ва автомобиль устахоналарида ноқонуний сақланаётган 4,6 мингта давлат рақами белгилари ва рўйхатдан ўтказиш гувоҳномалари аниқланган. Улардан фойдаланиш ҳолатлари бўйича 3 мингдан ортиқ мурожаат келиб тушган.
"Ушбу қўшимчанинг киритилиши фуқаролар ва давлат манфаатларига зарар етказилишининг, шунингдек, ҳуқуқбузарликлар ва жиноятлар содир этилишининг олдини олишга имкон беради," - дейилади ҳужжатда.
Бундан ташқари, лойиҳа МЖТКнинг 128−6-моддасига тузатишлар киритишни назарда тутади. Юк автомобилларини йўл четида тўхтатганлик учун базавий ҳисоблаш миқдорининг 5 баравари миқдорида жарима белгилаш таклиф этилмоқда, носозлик ёки бошқа мажбурий ҳолатлар бундан мустасно.
Ички ишлар вазирлиги маълумотларига кўра, оғир юк машиналарининг йўл четида тўхтаб туриши кўпинча тирбандликлар ва оғир оқибатларга олиб келадиган аварияларга, айниқса, тунги вақтларда сабаб бўлади.
Эслатиб ўтамизки, Тошкентда саккиз ой ичида 4,3 мингдан ортиқ йўл-транспорт ҳодисаси содир бўлган.
Изоҳлар мавжуд емас