Ўзбекистон, Тошкент - Batafsil.uz. Оила кодексига ўзгартириш ва қўшимчалар киритиш тўғрисидаги қонун лойиҳаси муҳокамага қўйилди. Оила ва хотин-қизлар қўмитаси томонидан илгари сурилган ушбу ҳужжатда ажрашиш истагида бўлган эр-хотинларга бериладиган ярашиш муддатини амалдаги олти ойдан бир йилгача ошириш таклиф этилмоқда.
Лойиҳада қайд этилишича, амалдаги қонунчилик оилавий муносабатларнинг муҳим жиҳатларини тўлиқ қамраб олмаяпти ва суд томонидан бериладиган муддат ярашиш учун етарли бўлмаяпти. Шунингдек, янги тартибга кўра, вояга етмаган болаларнинг тақдирига оид масалалар ҳам аниқлаштирилмоқда: суд ажримдан сўнг бола ким билан яшашини белгилаш билан бирга, алоҳида яшайдиган ота ёки онанинг бола билан кўришиш тартибини ҳам ўрнатади.
Бундан ташқари, болалар муассасаларига жойлаштирилган фарзандлар учун ундириладиган алиментлар бола номига очилган банк ҳисобварағига ўтказилиши ва бу маблағлар васийлик органлари томонидан назорат қилиниши белгиланмоқда. Шунингдек, бир йилдан кам вақт давомида бирга яшаган оилаларнинг ажрашиш ҳақидаги аризаларини кўриб чиқиш бўйича ҳам янги нормалар киритилиши кўзда тутилган. Оилавий зўравонлик ҳолатлари бундан мустасно эканлиги айтилмоқда.
Эслатиб ўтамиз, олдинроқ президент Шавкат Мирзиёев никоҳ шартномаси тузиш ғоясини фаолроқ тарғиб қилишга чақирганди. Унинг сўзларига кўра, бу болалар ҳуқуқларини ҳимоя қилиш, молиявий хатарларни камайтириш ва оилада масъулиятни кучайтиришга ёрдам беради. Давлат раҳбари сўнгги ойларда мамлакатда 32 мингдан зиёд оила ажрашгани, 16 минг ота-она алимент тўлашдан бўйин товлаётганини таъкидлаган эди.
Изоҳлар мавжуд емас