Ўзбекистон, Тошкент - Batafsil.uz. Ўзбекистонда гематологик ва онкогематологик беморларни даволашнинг замонавий усуллари жорий этилади. Илдиз ҳужайралари банкларини яратиш ва уларни трансплантация қилишни йўлга қўйиш, шунингдек, ген ва иммун терапиясини ривожлантириш режалаштирилган. Беморлар сифатли дори-дармон ва зарур сарфлов материаллари билан, тиббиёт муассасалари замонавий асбоб-ускуна ва молиялаштириш воситалари билан таъминланади.
Қон касалликлари билан оғриган беморларга тиббий ёрдам кўрсатишни такомиллаштиришга қаратилган тегишли қарор лойиҳаси Ўзбекистон президенти ташаббуси билан ишлаб чиқилган.
Гематологик ва онкогематологик касалликларни эрта аниқлаш улушини 60 фоизга етказиш, беморларни ихтисослаштирилган тиббий ёрдам билан 100 фоиз қамраб олиш, ҳудудларда қон ҳосил қилувчи ўзак ҳужайралар трансплантациясини йўлга қўйиш ҳужжатнинг асосий вазифалари сирасига киради.
Қон касалликларини эрта аниқлаш учун махсус сўровнома ишлаб чиқиш режалаштирилган бўлиб, ундан кўрик пайтида фойдаланилади. Бундан ташқари, тиббиёт бригадалари гематологик касалликларнинг бирламчи скрининги ва диагностикаси бўйича ўқитилади.
Беморларни йўналтириш тизими уч босқичли тамойил - туман даражасида бирламчи аниқлаш ва ташхис қўйиш, вилоят ва республика даражасида ташхисни тасдиқлаш, шунингдек, юқори технологик даволаш, реабилитация ва паллиатив ёрдам кўрсатиш асосида ишлайди.
Лойиҳа доирасида Республика ихтисослаштирилган гематология илмий-амалий тиббиёт маркази ҳузурида қон ва ўзак ҳужайралар криобанкини, трансплантация, ҳужайравий, генетик ва иммунотерапия илмий-клиник марказини ташкил этиш режалаштирилган. Бу ерда ҳам шундай касалликларга чалинган беморларга ташхис қўйиш, даволаш ва реабилитация қилишнинг янги модели жорий этилади.
Олий таълим, фан ва инновациялар вазирлиги билан биргаликда "Гемофилия," "Клиник гемостазиология" ва "Қон касалликларини инновацион даволаш" йўналишлари бўйича илмий мактаб ташкил этилади.
Эслатиб ўтамизки, Ўзбекистон ҳукумати 2035 йилгача онкологияга қарши курашиш бўйича Миллий дастурни ишлаб чиқди. Янги концепция доирасида онкологик беморларнинг камида 80 фоизини замонавий диагностика ва даволаш усуллари билан қамраб олиш режалаштирилган.
Изоҳлар мавжуд емас