Ўзбекистон, Тошкент - Batafsil.uz. 2030 йилга бориб Ўзбекистонда камбағалликни бутунлай тугатиш мумкин. Президент бундай натижага қандай эришиш мумкинлигини айтди.
Бу ҳақда Шавкат Мирзиёев бугун, 17 сентябрь куни Наманганда ўтаётган "Камбағалликдан фаровонликка" III халқаро форумининг очилиш маросимида маълум қилди. Бунда "Камбағалликдан - фаровонлик сари" дастури асосий роль ўйнаши лозим. Унинг асосини еттита устувор йўналиш ташкил этади.
Барқарор даромад манбаларини яратиш
2024 йилда юртимизда 35 миллиард доллар инвестиция ўзлаштирилиб, 9 мингдан зиёд янги корхона ташкил этилган, 300 мингга яқин юқори даромадли иш ўрни яратилган.
Давлат бизнес учун шароит яратади, тадбиркорлар эса ижтимоий масъулиятни ўз зиммасига олиб, камбағалларга доимий иш ва даромад топишга ёрдам беради. Шу йилнинг ўзида кам таъминланган оилаларнинг 270 мингдан зиёд аъзоси доимий иш ўрнига эга бўлди.
Сифатли таълим - асосий "двигатель"
Кам таъминланган оилалар фарзандлари мактабгача таълим билан тўлиқ қамраб олинади; Уларнинг хорижий тилларни ўрганиш ва касб ўрганиш харажатларининг 80 фоизи қоплаб берилади.
Сўнгги беш йилда 800 мингдан зиёд аҳоли замонавий касб-ҳунарларга ўқитилиб, юқори даромадли ишларга жойлаштирилди. Хорижда тан олинадиган сертификатлар бериладиган халқаро касбга тайёрлаш марказлари ташкил этилмоқда.
Хотин-қизларнинг ижтимоий ҳаётдаги иштирокини кенгайтириш
Талаба қизларга фоизсиз кредитлар ажратилиб, магистратурада бепул ўқиш имконияти яратилмоқда. Бугунги кунда барча талабаларнинг 53 фоизи аёллардир.
Жорий йилда 1 миллион 700 минг нафар хотин-қиз ишга жойлаштирилди. Бунга хотин-қизлар тадбиркорлигини ривожлантириш ҳам ёрдам беради. 2024 йилда уни қўллаб-қувватлаш учун 1,5 миллиард доллар йўналтирилади.
2025 йилда яна 2 миллион нафар хотин-қизларни доимий даромад билан таъминлаш режалаштирилган. Хусусан, бунинг учун 50 минг нафар қизлар ІТ, финтех ва сунъий интеллект бўйича ўқитилади.
Соғлиқни сақлаш - инсон салоҳиятини рўёбга чиқаришнинг асоси
Кам таъминланган оилаларга шифокорлар бириктирилиб, ҳар йили комплекс текширувдан ўтказилмоқда. Кафолатланган тиббий ёрдам ҳажмлари кенгайтирилиб, бундай оилаларнинг тиббий хизматлар учун харажатлари 2 бараварга - бепул дорилар ва кафолатланган ёрдам пакетлари ҳисобига қисқартирилади.
Аниқ ижтимоий ҳимоя
Ўзбекистонда ижтимоий ҳимоя тизими тўлиқ қайта шакллантирилди: бунинг учун Миллий агентлик ташкил этилди, барча шаҳар ва туманларда "ягона дарча" тамойили асосида 100 дан ортиқ ижтимоий хизмат турларини кўрсатувчи "Инсон" марказлари очилди. Ҳар бир маҳаллада ижтимоий ходимлар ишламоқда. Ўтган йили 2 миллион 700 минг фуқарога хизмат кўрсатилди. Эҳтиёжманд аҳолини кундузги парваришлашнинг янги шакллари жорий этилгани 50 минг нафар меҳнатга лаёқатли оила аъзоларига ишга қайтиш имконини берди.
Ижтимоий хизматлар сифати ва қамровини ошириш мақсадида Жаҳон банки билан ҳамкорликда 100 миллион долларлик лойиҳа бошланган. Ногиронлиги бўлган болаларни мактаб ва касб-ҳунар таълимига қамраб олиш бўйича алоҳида дастурлар амалга оширилмоқда.
Инфратузилма - кўп ўлчовли камбағалликни камайтиришнинг муҳим омили
3 миллион 500 мингга яқин аҳолиси бўлган мингта шароити оғир маҳаллада катта-катта лойиҳалар амалга оширилмоқда. 2025 йилда инфратузилмани яхшилаш, иш ўринлари яратиш ва тадбиркорликни қўллаб-қувватлашга яна 400 миллион доллар йўналтирилади: 32 та туман ва 328 та оғир маҳалла танлаб олиниб, улар бўйича алоҳида ривожланиш дастурлари қабул қилинади.
Шу билан бирга, 810 та маҳаллада сув, оқова, йўл, мактаб ва боғча қуриш бўйича 1,3 миллиард долларлик лойиҳалар амалга оширилмоқда. Эҳтиёжманд ва кам таъминланган аҳолига ипотека кредити учун йилига 200 миллион доллар субсидия бериш кўзда тутилмоқда.
Давлат харажатларининг 70 фоиздан ортиғи - барқарор ривожланиш мақсадларига
Бирлашган Миллатлар ташкилоти томонидан белгиланган Барқарор ривожланиш мақсадларига эришиш учун ривожланаётган мамлакатларга ҳар йили 4 триллион доллардан ортиқ маблағ зарур. Бундай шароитда "камбағалликка қарши курашишнинг янги молиявий архитектураси" - хатарларни объектив баҳолаш, ресурсларни жалб қилиш ва уларнинг самарадорлигини ошириш зарурати юзага келади.
Бу борада 2026 йилда Хива шаҳрида халқаро молия институтлари, донор ташкилотлар ва ҳамкор давлатлар иштирокида конференция ўтказилади.
Кеча, 16 сентябрь куни Шавкат Мирзиёев Уйчи туманида Наманган вилоятини ижтимоий-иқтисодий ривожлантириш чора-тадбирлари юзасидан йиғилиш ўтказди. Йил якунигача 4,2 миллиард доллар инвестиция жалб қилиб, экспортни 1 миллиард долларга етказиш, 323 минг аҳолини банд қилиш, 26 минг оилани камбағалликдан чиқариш бўйича топшириқлар берилди.
Изоҳлар мавжуд емас