Ўзбекистон, Тошкент - Batafsil.uz. АҚШ Президенти Дональд Трамп ва Ўзбекистон Президенти Шавкат Мирзиёевнинг Вашингтондаги учрашуви доирасида икки давлат ўртасида муҳим минерал ресурслардан фойдаланиш имкониятларини кенгайтиришга қаратилган "Қўшма инвестициявий асослар" келишуви имзоланди. Мазкур ҳужжат АҚШ Халқаро тараққиёт молия корпорацияси (DFC) орқали Ўзбекистоннинг бой хом ашё базаси, жумладан, литий, мис ва вольфрам захираларини ўзлаштириш ҳамда таъминот занжирларида Хитой гегемонлигига қарши туришни назарда тутади.
Битимга асосан, томонлар қидирув, қазиб олиш ва қайта ишлаш босқичларини қамраб олувчи "Ўзбекистон–АҚШ қўшма инвестиция холдинг компанияси"ни ташкил этишни режалаштирмоқдалар. Ушбу компания нафақат тоғ-кон саноати, балки йирик инфратузилма ва энергетика лойиҳаларини ҳам молиялаштириш билан шуғулланади. Ўзбекистон ўз навбатида замонавий технологиялар учун ўта муҳим ҳисобланган олтин, уран ва мис захиралари билан бир қаторда, ҳали ўзлаштирилмаган ўнлаб турдаги нодир минералларни биргаликда қазиб олишни таклиф этмоқда.
Дональд Трамп ҳокимиятга қайтганидан сўнг Марказий Осиё давлатлари билан алоқаларни кучайтириш, минтақада Россия ва Хитой таъсирига мувозанат ўрнатиш стратегиясини амалга оширмоқда. Шу йилнинг бошида ўтказилган минераллар саммитида 11 та давлат, жумладан, Ўзбекистон билан ҳам англашув меморандумлари имзоланган эди. Президент Шавкат Мирзиёев Вашингтонда, шунингдек, Трамп томонидан ташкил этилган Тинчлик кенгашининг (Board of Peace) илк йиғилишида ҳам иштирок этиб, иқтисодий ислоҳотлар ва стратегик ҳамкорликни давом эттиришга тайёрлигини билдирган.
Бугун Ўзбекистон Президенти Шавкат Мирзиёевнинг Вашингтонга ташрифи доирасида АҚШ маъмурияти ва молиявий институтлари билан ўтказилган музокараларда энергетика, IT ва тоғ-кон саноатидаги лойиҳаларни қамраб олган 35 миллиард долларлик уч йиллик ҳамкорлик дастурини келишиб олгандилар.
Изоҳлар мавжуд емас