Ўзбекистон, Тошкент - Batafsil.uz. 25-февраль куни соат 21:46 да Тошкент шаҳрида юз берган мудҳиш йўл транспорт ҳодисаси натижасида вояга етмаган ўқувчи бошқарувидаги BMW M4 русумли автомашина ЙПХ ходимини уриб юборгани ҳақида хабар берган эдик. Инспектор оғир тан жароҳатлари билан шифохонага ётқизилган.Мазкур ҳолат жамоатчиликда катта резонанс келтириб чиқарди.
Аниқланишича, 15 ёшли ўсмир ҳайдовчилик гувоҳномасисиз транспорт воситасини бошқарган. Ўрганишлар давомида ушбу ўсмир аввал ҳам мактабда дарс қолдиргани ва ўзбошимчалик билан машина бошқаргани учун икки бор — 2025-йилнинг сентябрида ҳамда жорий йилнинг январида ҳам маъмурий жавобгарликка тортилгани, бироқ ота-онаси ўз фарзандига нисбатан лоқайдлик қилгани маълум бўлган.
Транспорт воситаси 2002-йилда туғилган Лейла Атадияновага тегишли бўлиб, у ўз автомашинасини ҳайдовчилик ҳуқуқи бўлмаган шахсга ишониб топширган. Текширувлар натижасида ушбу фуқаронинг ўзи ҳам 2024-йилдан буён 18 маротаба транспорт воситасини ҳуқуқи бўлмаган шахсга бергани ва 37 маротаба бошқа турдаги қоидабузарликларга йўл қўйгани аниқланган.
Ўсмирнинг отаси фарзандининг қилмишидан пушаймон эканини билдириб, барча ота-оналарни фарзанд тарбиясида ҳушёр бўлишга чақирган: "Лоқайдлигим оқибатида ўғлим қотил бўлиб қолиши мумкин эди".
Ҳозирда Mиробод туман прокуратураси томонидан Ўзбекистон Республикаси Жиноят кодексининг 266-моддаси билан жиноят иши қўзғатилиб, дастлабки тергов ҳаракатлари олиб борилмоқда.
Воқеа фонида ижтимоий тармоқларда кенг тарқалган, қонунбузарликларни тарғиб қилувчи видеолар муаллифи UZBELAS Performance ишчиси Асадбек Жумаев ҳам жавобгарликка тортилган. У ўз видеоларида "қонунбузарликлар учун арзимас жарима тўланади" қабилидаги мазмунсиз ва ёлғон маълумотларни тарқатганини тан олган. Интернетда қонунбузарликни тарғиб қилувчи "контент" яратган шахсга Маъмурий жавобгарлик тўғрисидаги кодекснинг 201-1-моддаси асосан 60 та базавий ҳисоблаш миқдорида жарима белгиланган.
ИИББ вакилларининг таъкидлашича, бундай "пиар"лар жамиятда қонун устуворлигига нисбатан нотўғри фикр уйғотмоқда. Ҳар қандай хавфли хатти-ҳаракатларни тарғиб қилувчи ахборот эгалари учун жазо муқаррар.
Расмийлар яна бир бор барча ота-оналарни вояга етмаган фарзандларига транспорт воситаларини ишониб топширмасликка, йўл ҳаракати қоидаларига қатъий риоя қилишга чақирмоқда.
Бундан олдин Ички ишлар вазирлиги ЙПХ ходими вафот этгани ҳақида тарқалган хабарларни рад этганди.
Изоҳлар мавжуд емас