Ўзбекистон, Тошкент - Batafsil.uz. АҚШнинг Жанубий ва Марказий Осиё бўйича махсус вакили Сержио Гор янги ташкил этилган АҚШ–Ўзбекистон ишбилармонлик ва инвестиция кенгашига раҳбарлик қилишини маълум қилган. Кенгаш "Америка биринчи" дастури доирасида икки мамлакат ўртасида иқтисодий ҳамкорликни кучайтиришни мақсад қилади.
Бундан олдин Президент Шавкат Мирзиёев АҚШ-Ўзбекистон бизнес ва инвестициялар кенгашини ташкил этиш тўғрисидаги фармонни имзолаганди. Тузилмага Ўзбекистон Президенти Администрацияси раҳбари Саида Мирзиёева бошчилик қилиши белгиланган.
Кенгаш ишини АҚШ томонидан элчи Сержио Гор, Ўзбекистон томонидан эса Президент Администрацияси раҳбари Саида Мирзиёева ҳамкорликда бошқариб боради. Унинг фаолияти АҚШнинг иқтисодий етакчилигини мустаҳкамлаш ва хорижий ҳамкорликдан америкаликлар манфаатдор бўлишини таъминлашга қаратилган.
Кенгаш инвестиция ва экспорт имкониятларини кенгайтириш, АҚШ технологиялари ва мутахассислари учун IT ҳамда рақамли инновациялар соҳасида янги йўналишларни ривожлантиришга эътибор қаратади. Экспортчилар учун тенг рақобат муҳитини шакллантириш вазифаси ҳам белгиланган.
Эслатиб ўтамиз, Америка Қўшма Штатлари президенти Дональд Трамп ўзининг "Truth Social" саҳифасида келгуси уч йилда Ўзбекистон АҚШнинг муҳим тармоқларига тахминан 35 миллиард доллар сармоя киритишини, кейинги ўн йилда эса ушбу кўрсаткич 100 миллиард доллардан ошиши кутилаётганини маълум қилганди.
Изоҳлар мавжуд емас