Ўзбекистон, Тошкент - Batafsil.uz. Қурилиш ва уй-жой коммунал хўжалиги вазирлигининг бош мутахассиси Тошкент шаҳрида хизмат кўрсатувчи компания раҳбаридан 1500 доллар миқдорида пора олаётган вақтида қўлга олинди.
Тезкор тадбир давомида вазирлик ходими ҳуқуқни муҳофаза қилувчи орган ходимларидан қочишга уринган, бироқ кўрилган чоралар натижасида тўхтатиб қолинган. Ушланиш вақтида гумонланувчи ўзини йўқотиб қўйганини ва қўрқув сабабли қочмоқчи бўлганини баён қилган. Шунингдек, холислар иштирокидаги кўздан кечириш жараёнида унинг спиртли ичимлик таъсирида бўлгани аниқланган.
Суриштирув ишларига кўра, бош мутахассис Юнусобод туманидаги 6 та кўп қаватли уйга хизмат кўрсатиш ҳуқуқини бир корхонадан иккинчисига ўтказиб беришни ваъда қилган. Бунинг учун у уй-жой мулкдорлари имзолаган далолатномаларни "Mening uyim" биллинг платформасидан рўйхатдан ўтказиб бериш эвазига жами 2200 доллар талаб қилган. Гумонланувчи ушбу масалани вазирликдаги мансабдор танишлари орқали ҳал қилиб беришни режалаштирган.
Ҳозирда мазкур ҳолат юзасидан вазирлик ходимига нисбатан жиноят иши қўзғатилган. Тергов ҳаракатлари давом этмоқда. Гумонланувчининг автомобили ва бошқа ашёвий далиллар холислар иштирокида процессуал тартибда расмийлаштирилган.
Бундан олдин Иқтисодий жиноятларга қарши курашиш департаментининг Пахтакор туман бўлими катта тезкор вакили мактаблар учун интерактив доскалар етказиб бериш шартномасини юқори нархда расмийлаштириб бериш эвазига пора олаётганда ушланганди.
Изоҳлар мавжуд емас