Ўзбекистон, Тошкент - Batafsil.uz. Ижтимоий тармоқларда кескин муҳокамаларга сабаб бўлган "Сизники борми?" ибораси ишлатилган дуэт ижрочиси Якзон юзага келган вазият бўйича расмий муносабат билдирди. Хонанда ўз чиқишида мазкур контент кўпчиликнинг эътирозларига сабаб бўлганини тан олиб, бунинг учун узр сўради.
Унинг таъкидлашича, Нилуфар Ҳамидова билан қилинган мазкур контентдан кўзланган асосий мақсад фақатгина "кулги улашиш" бўлган. Бироқ ижрочи мақсадлар ҳар доим ҳам кутилган натижани бермаслигини ва жамоатчиликнинг ғашига тегганини эътироф этган.
Хонанда юзага келган ноқулайлик учун ўзини айбдор деб ҳисоблашини ва келажакда кузатувчилар учун фақат яхши, миллий маънавиятга мос контентлар тақдим этишга ваъда беришини маълум қилган.
Маълум бўлишича, "Ўзбекконцерт" давлат муассасаси мутасаддилари томонидан ижодкорлар билан тушунтириш ишлари олиб борилган. Якзон санъаткорларни қўллаб-қувватлагани ва хатоларни англашда ёрдам бергани учун муассаса ходимларига алоҳида миннатдорчилик билдирган.
Аввалроқ мазкур қўшиқ матнидаги беҳаё ишоралар сабабли Маданият вазирлиги ва "Ўзбекконцерт" фаолияти танқид остига олинган эди. Ижрочиларнинг узр сўраб чиқиши ва мутасаддиларнинг аралашуви жамоатчиликнинг ҳақли эътирозлари натижаси сифатида баҳоланмоқда.
Изоҳлар мавжуд емас