Ўзбекистон, Тошкент – Batafsil.uz. Жиноят ишлари бўйича Тошкент шаҳар суди 38 ёшли Илдар Хайрулинни ўзини ўзи эълон қилган Донецк Халқ Республикаси (ДХР) ҳудудида хизмат қилганликда айбдор деб топиб, беш йилга озодликдан маҳрум қилган. Маҳкумнинг қариндошлари буни хато деб айтишмоқда, чунки ўша пайтда у Татаристонда ишлаган ва жанговар ҳаракатларда қатнашмаган. Бу ҳақда “Фарғона" АА маълумотларига асосланиб, мухбиримиз хабар бермоқда.
Илдар Хайрулин Тошкент вилояти Юкоричирчиқ туманида туғилган. Тергов маълумотларига кўра, 2014-2015 йилларда у Украинада давлат қуролли кучларига қарши жанговар ҳаракатларда қатнашган. Далил сифатида терговчи "Миротворец" сайтида Хайрулин номига очилган профилни келтирган. Сайт Украинанинг душмани деб ҳисоблаган одамларнинг шахсий маълумотларини нашр этиш билан машҳур.
Текширувда тасдиқланишича, ҳарбий кийимда ва қўлида қурол билан суратга олинган одам ҳақиқатан ҳам Илдар Хайрулиндир. Экспертиза хулосасида айтилишича, у ўз хабарларида Украинадаги ҳарбий ҳаракатлар тўғрисида маълумот берган ва жанговар ҳаракатларда иштирок этиш учун ҳаракатланган. Хайрулиннинг мобил телефонида унга қўйилган айбловни тасдиқловчи расмлар топилган. Натижада Хайрулинга Ўзбекистон Республикаси Жиноят кодексининг 154-моддаси 1-қисми (ёлланиш) бўйича айблов қўйилган.
Айбланувчининг қариндошлари "Миротворец" веб-сайтидаги фотосурат Хайрулинга тегишли эканлигини тасдиқлашган, аммо бу сурат Илдар Россияда бўлганида олинганлигини айтишган. Уларнинг сўзларига кўра, у ҳеч қачон Украинага бормаган. Фотосуратда олинган қурол эса ўқотар эмас – "пневматик қурол, у коптокчаларни отади", -дея маълум қилишган.
Маҳкумнинг онаси Мадин Хайрулина 2014 йилда Илдар Татаристонда бўлганини ва ҳеч қандай ҳарбий ҳаракатларда иштирок этмаганини билдирган. Хайрулиннинг қариндошлари 23 октябрда чиқарилган ҳукм устидан шикоят қилмоқчи.
Аввалроқ Ўзбекистон ҳукумати ўз фуқароларини хориждаги жанговар ҳаракатларда иштирок этишдан бир неча бор огоҳлантирган эди. Ташқи меҳнат миграцияси агентлиги, Ўзбекистоннинг Россия Федерациясидаги элчихонаси ва республика Бош прокуратураси жиноят кодексининг 154-моддасини эслатиб ўтишган, яъни бу моддага асосан ўн йилгача озодликдан маҳрум қилиш мумкин.
2022 йил сентябр ойида Ўзбекистон мусулмонлар Идораси фатво чиқарган бўлиб, унда мусулмонга ўз ватанини ҳимоя қилишдан бошқа ҳеч қандай ҳарбий ҳаракатларда қатнашишга рухсат берилмагани айтилган.
Изоҳлар мавжуд емас