Ўзбекистон, Тошкент - Batafsil.uz. Жаҳон миқёсидаги кескин норозиликлардан сўнг, FIFA Шимолий Америкада бўлиб ўтадиган Жаҳон чемпионати чипталари нархини пасайтиришга мажбур бўлди. Эндиликда энг содиқ мухлислар финал ўйини учун 4185 доллар ўрнига 60 долларлик чипталарни қўлга киритишлари мумкин.
Яқинда 2026 йилги футбол бўйича жаҳон чемпионати (ЖЧ-2026) ўйинларига чипталар сотишнинг биринчи босқичи – тасодифий танлов бошлан эди. BBC маълумотига кўра, бюджет тоифадаги финал ўйини чиптасининг нархи 3119 фунт стерлингдан (тахминан 4185 АҚШ доллари) бошланади. Бу ЖЧ-2022 (Қатар)даги энг арзон чипта нархидан (450 фунт / 600 доллар) деярли етти баравар қиммат бўлган.
FIFA 16 декабрь Шимолий Америкадаги турнирнинг ҳар бир ўйини учун 60 долларлик чипталар сотувга чиқарилишини эълон қилди.
Ушбу чипталар миллий федерацияларга юборилади ва улар аввалги уй ва сафар ўйинларига мунтазам ташриф буюрган содиқ мухлисларга тақсимланади.
FIFA буни "Мухлислар учун кириш даражаси" деб атамоқда. 60 долларлик чипталар сони ҳар бир ўйин учун минглаб эмас, балки юзлаб бўлиши кутилмоқда.
Мухлисларнинг ғазаби FIFA ўтган ҳафта эълон қилган дастлабки чипталар режасидан кейин авж олган.
Хусусан, португалиялик ва нидерландиялик мухлислар чипталар нархи жуда қимматлиги сабабли 2026-йилги Жаҳон чемпионатини бойкот қилишлари мумкинлигини эълон қилишганди.
Мезбон бўлмаган давлатлар иштирокидаги гуруҳ босқичи ўйинлари учун энг арзон чипталар 120 дан 265 долларгача белгиланган эди.
Мезбон давлатлар саккиз йил олдин юз минглаб 21 долларлик чипталар сотилишини ваъда қилган эди, бироқ FIFA буни инобатга олмаган.
АҚШ кўнгилочар саноатига хос бўлган динамик нарх белгилаш ва қўшимча тўловлар режалари футбол мухлислари томонидан кескин танқид қилинган.
Нархларни туширишдан ташқари, FIFA яна бир қатор енгилликларни ҳам эълон қилган. 19-июльдаги финалдан кейин пулни қайтаришда ҳеч қандай маъмурий тўловлар ундирилмайдиган бўлган.
48 та жамоа иштирок этадиган ушбу илк турнирдан FIFA 10 миллиард доллар даромад олишни кутмоқда.
Изоҳлар мавжуд емас