Ўзбекистон, Тошкент - Batafsil.uz. АҚШ Давлат котиби Марко Рубио Вашингтон Эрон операцияси якунланганидан сўнг НАТОнинг аҳамиятини қайта баҳолашини маълум қилди. Бунга Европа иттифоқчиларининг қуролли можаро пайтида АҚШни қўллаб-қувватлашдан бош тортгани сабаб бўлган.
Fox News телеканалига берган интервьюсида Рубио блокнинг ҳозирги ҳолатини "бир томонлама кўча" деб атади. Унинг фикрича, Америка доимий равишда Европанинг ҳимоячиси ролини ўйнамоқда, аммо зарур пайтда иттифоқчилардан тегишли ёрдам олмаяпти.
АҚШ раҳбариятининг норозилигига Европа давлатларининг бир қатор ҳаракатлари сабаб бўлган. Хусусан, иттифоқчилар АҚШга ўз ҳарбий базаларидан фойдаланишга рухсат бермаган ва самолётларнинг ҳаво ҳудуди орқали ўтишини чеклаган. Франция Исроилга йўл олган ҳарбий-транспорт самолётлари учун ҳаво йўлагини тақдим этишдан бош тортган бўлса, Президент Трамп Лондонни Эронга қарши операцияда қатнашишдан бўйин товлаганликда айблаган.
Марко Рубионинг баёноти Трамп маъмурияти ва Европа етакчилари ўртасидаги очиқ зиддият фонида янграган. Давлат котибининг таъкидлашича, илгари АҚШ манфаатларига яхши хизмат қилган альянс эндиликда ўз мақсадларига мувофиқлиги бўйича жиддий текширувдан ўтиши керак.
Ўз навбатида, Франция томони НАТО мудофаа альянси эканини эслатиб, Трампнинг айбловларига жавоб қайтарган. Мутахассисларнинг фикрича, АҚШнинг альянсдан чиқиши ҳақидаги таҳдидлар Европадаги хавфсизлик тизимини тубдан ўзгартириб юбориши мумкин. Ҳозирда Вашингтон ўз иттифоқчилари билан муносабатларни стратегик жиҳатдан қайта кўриб чиқишга тайёрланмоқда.
Аввалроқ Канада Қуролли кучлари АҚШнинг эҳтимолий ҳарбий инвазиясига қарши туриш учун Афғонистондаги партизанлик уруши тажрибасидан фойдаланишни режалаштирганди. Бу Дональд Трамп маъмурияти ва НАТО иттифоқчилари ўртасидаги кескинлик ортиб бораётган бир пайтда ишлаб чиқилган махсус стратегик моделда кўзда тутилган эди.
Изоҳлар мавжуд емас