Ўзбекистон, Тошкент - Batafsil.uz. Исроил ва ҲАМАС Дональд Трамп таклиф қилган тинчлик режасининг биринчи босқичини келишиб, имзолади. У барча гаровга олинганларни тез орада озод қилишни ва Исроил қўшинларини белгиланган чегарага олиб чиқишни назарда тутади.
Бу ҳақда АҚШ президентининг Truth Social аккаунтида эълон қилинган хабарида айтилади.
Тинчлик режасининг биринчи босқичида ҳарбий ҳаракатларни зудлик билан тўхтатиш, шунингдек, Исроил қамоқхоналарида сақланаётган юзлаб фаластинлик маҳбуслар эвазига Ғазода гаровга олинганларнинг барчасини озод қилиш кўзда тутилган. Эришилган келишувлар доирасида ҲАМАС барча гаровга олинганларни озод қилишга рози бўлди, Исроил эса қўшинларини келишилган чизиқларга олиб боради.
Исроил бош вазири Биньямин Нетаняху гаровга олинган барча исроилликлар тез орада уйларига қайтишига умид билдирди. У эришилган келишувларни "дипломатик муваффақият", шунингдек, "Исроил учун миллий ва маънавий ғалаба" деб атади. Бош вазир Америка президентига "етакчилик, ҳамкорлик ва Исроил хавфсизлиги ва гаровга олинган исроилликлар эркинлигига қатъий содиқлиги" учун миннатдорчилик билдирди.
Трампнинг сўзларига кўра, имзоланган келишув "кучли, мустаҳкам ва абадий тинчлик" йўлидаги илк қадамлар бўлади. У барча томонлар тенг шароитларга қўйилишини таъкидлаб, эришилган келишувни "араб ва мусулмон дунёси, Исроил, қўшни давлатлар ва Қўшма Штатлар учун буюк кун" деб атади.
Америка президенти, шунингдек, Қатар, Миср ва Туркиядан келган воситачиларга музокараларда кўрсатган ёрдами учун миннатдорчилик билдириб, айнан ҳамкорликдаги иш "тарихий ва мисли кўрилмаган натижага" эришиш имконини берганини таъкидлади.
"Тинчликпарварларга раҳмат", - дейилади унинг баёноти якунида.
Эслатиб ўтамизки, аввалроқ Дональд Трамп Фаластиннинг ҲАМАС ҳаракатига ультиматум қўйиб, агар у тинчлик шартномасини имзолашдан бош тортса, "мисли кўрилмаган дўзах" билан таҳдид қилганди.
Изоҳлар мавжуд емас