Ўзбекистон, Тошкент - Batafsil.uz. Мадагаскар президенти Андри Раджоэлина сўнгги йиллардаги энг йирик норозилик намойишлари ортидан мамлакатни тарк этди. Бунга сув ва электр таъминотидаги узилишлар, нархларнинг ошиши ва ҳукуматдаги коррупция сабаб бўлган. Норозилик, айниқса, ҳукуматдан ислоҳотлар ва президентнинг истеъфосини талаб қилган ёш аҳоли - яъни Z авлоди орасида кучайди.
Митинглар бир неча ҳафта олдин, 25 сентябрь куни пойтахт Антананаривуда бошланган, кейин бошқа шаҳарларни ҳам қамраб олган. Аввалига полиция намойишчиларни тарқатишга ҳаракат қилган, бироқ кейинроқ армиянинг бир қисми улар томонига ўтган. Бу амалдаги ҳокимиятга қарши қўзғолон учун ишора бўлди.
Reuters агентлиги маълумотларига кўра, шундан сўнг Раджоэлина 13 октябрь, якшанба куни Франция ҳарбий самолётида мамлакатдан учиб кетган. Мухолифатнинг таъкидлашича, президент маъмурияти унинг кетишини тасдиқлаган, бироқ у ҳозир қаерда экани номаълум.
Кейинроқ Раджоэлина Facebook орқали халққа мурожаат қилиб, "ўз хавфсизлиги учун хавфсиз жойга яширинишга" мажбур бўлганини, аммо истеъфога чиқмоқчи эмаслигини ва "Мадагаскарни вайрон қилишга" йўл қўймаслигини айтди.
Франциянинг RFI нашри президент Эммануэль Макрон билан келишув тузиши мумкинлигини маълум қилди. Аммо Ғазо саммитидан кейин Мисрда бўлган Макроннинг ўзи Мадагаскар раҳбарини олиб чиқишда Франциянинг иштирокини тасдиқлашдан бош тортди. Унинг сўзларига кўра, Париж конституциявий тартиб сақланиб қолишини қўллаб-қувватлайди ва ҳарбийларнинг аралашувига қарши чиқади.
Африкада Z авлодининг норозиликлари янги тенденцияга айланмоқда. Аввалроқ, Марокашда 2030 йилги футбол бўйича жаҳон чемпионатига тайёргарлик кўриш учун коррупция ва исрофгарчиликка қарши оммавий акциялар бўлиб ўтганди. У ерда полиция билан тўқнашувларда юзлаб одамлар жабрланган.
Изоҳлар мавжуд емас