Ўзбекистон, Тошкент - Batafsil.uz. Шанба куни Америка Қўшма Штатларининг деярли барча йирик шаҳарларида президент Дональд Трамп маъмуриятига қарши қаратилган кенг кўламли "No Kings" ("Қироллар керак эмас") намойишлари бўлиб ўтди. Ташкилотчиларнинг дастлабки ҳисоб-китобларига кўра, акцияларда 8 миллиондан ортиқ киши иштирок этган бўлиб, бу октябрь ойидаги кўрсаткичлардан (7 миллион) ҳам юқори натижадир.
Намойишчилар Оқ уй раҳбари томонидан амалга оширилаётган иммиграция соҳасидаги кескин чоралар, Эрон билан давом этаётган ҳарбий ҳаракатлар ҳамда мамлакатда яшаш таннархининг тез суръатларда ошишига ўз норозиликларини билдиришган. Намойиш ташкилотчилари ўз баёнотида: "Трамп бизни мустабид каби бошқармоқчи. Бироқ бу — Америка ва ҳокимият "қирол бўлишни орзу қилаётганлар" ёки уларнинг миллиардер шерикларига эмас, балки халққа тегишлидир", — дея таъкидлаган.
Асосий намойишлар Вашингтондаги Линкольн мемориали ва Миллий аллеяда бўлиб ўтган, у ерда минглаб одамлар Трамп ва вице-президент Жей Ди Вэнснинг истеъфосини талаб қилган.
Миннесота штатининг Сент-Пол шаҳри ҳам диққат марказида бўлган. Бу ерда январь ойида федерал агентлар томонидан икки нафар АҚШ фуқароси ўлдирилганди. Бу иммиграция сиёсатига нисбатан нафратни кучайтириб юборган.
Мазкур акцияда афсонавий хонанда Брюс Спрингстин саҳнага чиқиб, ўзининг Streets of Minneapolis номли протест қўшиғини ижро этган.Нью-Йоркдаги Таймс-скверда эса машҳур актёр Роберт Де Ниро намойишчиларга мурожаат қилган. У Трампни "ақлдан озган" деб атаб, унинг сиёсати кун сайин ёмонлашиб бораётганини ва халқ тинч йўл билан бўлса-да, режимга қарши курашиши шартлигини билдирган.
Намойишларнинг аксарияти тинч руҳда ўтган бўлса-да, айрим ҳудудларда вазият кескинлашган. Лос-Анжелесда намойишчилар федерал бинони қуршаб олиши натижасида хавфсизлик кучлари билан тўқнашувлар содир бўлган, натижада бир неча киши ҳибсга олинган. Далласда эса Трамп тарафдорлари (қарши намойишчилар) билан кичик муштлашувлар кузатилган.
Оқ уй матбуот хизмати ушбу намойишларни "Трампни бостиришга қаратилган психотерапия сеанслари" деб атаб, бу воқеалар фақатгина уларни ёритаётган журналистларни қизиқтиришини таъкидлаган.
Шуни таъкидлаш лозимки, 2025 йил январида ҳокимиятга қайтган Дональд Трамп президентлик ваколатларини сезиларли даражада кенгайтирган. У федерал ҳукуматнинг айрим қисмларини тугатиш ва штат губернаторларининг қаршилигига қарамай Миллий гвардияни шаҳарларга жойлаштириш учун фаол равишда ижроия буйруқларидан фойдаланмоқда. Мухолифат ва ҳуқуқ фаоллари бу ҳаракатларни Америка демократияси ва конституциясига таҳдид сифатида баҳоламоқда.
Изоҳлар мавжуд емас