Ўзбекистон, Тошкент - Batafsil.uz. Миннесота штатида АҚШ иммиграция ва божхона полицияси ходими томонидан маҳаллий аёлнинг ўлдирилиши Вашингтон ва штат раҳбарияти ўртасида очиқ зиддиятни келтириб чиқарди. Иммиграция Департаменти воқеани "ички терроризм" деб атамоқда.
2026 йил 7 январь куни Миннеаполисда Трамп маъмуриятининг иммиграция сиёсатига қарши ўтказилаётган намойишлар чоғида фожиа содир бўлган. АҚШ Иммиграция ва божхона назорати (ICE) ходими 37 ёшли маҳаллий шоира Рене Гудни отиб ўлдирган. Федерал ҳукумат аёл ўз автомобили билан агентларни босиб кетишга уринганини даъво қилмоқда.
Бироқ шаҳар мэри ва штат губернатори бу талқинни кескин рад этиб, федерал кучларни шаҳардан чиқиб кетишга чақирган.
Ички хавфсизлик вазири Кристи Ноемнинг сўзларига кўра, намойишчилар қорда қолиб кетган полиция ходимининг машинасини қуршаб олган. Марҳума ўз автомобилини "қуролга айлантириб", ходимларни ўлдириш ниятида ҳаракат қилган. Шу сабабли агент ўзини ҳимоя қилиш мақсадида ўқ узган.
Миннеаполис мэри Жейкоб Фрей федерал баёнотни "уйдирма" деб атаган. Миннесота губернатори Тим Уолз эса Трамп маъмуриятини мамлакатда қўрқув муҳитини яратишда айблаган ва штатда тартибни сақлаш учун Вашингтон ёрдамига муҳтож эмаслигини билдирган.
Маҳаллий полиция бошлиғининг айтишича, аёл йўлни тўсиб турган машинада бўлган ва агент унга яқинлашганда ҳаракатлана бошлаган, шу заҳоти камида иккита ўқ узилган.
Мазкур фожиа Дональд Трамп иккинчи муддатга келганидан сўнг иммиграцияни назорат қилиш учун Миллий гвардия ва ICE бўлинмаларини шаҳарларга жойлаштириш ҳақидаги қароридан кейинги илк қонли тўқнашув бўлди. Губернатор Уолз федерал кучларга қаршилик кўрсатиш учун штат Миллий гвардиясини шай ҳолатга келтирганини эълон қилди.
Ҳозирда воқеа юзасидан Федерал қидирув бўлими тергов бошлаган. Намойишчилар эса федерал агентларнинг ҳаракатини
бегуноҳ инсонни ваҳшийларча ўлдириш деб баҳолаб, оммавий норозиликларни давом эттирмоқда.
Эслатиб ўтамиз, АҚШнинг Род-Айленд штати, Провиденс шаҳридаги Браун университети ҳудудида содир бўлган оммавий отишма оқибатида Ўзбекистон Республикаси фуқароси, талаба МуҳаммадАзиз Умурзоқов ҳалок бўлганди.
Изоҳлар мавжуд емас