Ўзбекистон, Тошкент - Batafsil.uz. АҚШ федерал суди президент Дональд Трампнинг Оқ уй ҳудудида янги ҳашаматли зал қуриш режасини тўхтатиб қўйди. Судья Ричард Леон ўз қарорида президент бинонинг эгаси эмас, балки унинг вақтинчалик бошқарувчиси эканини алоҳида таъкидлади.
Хабарларга кўра, Оқ уйнинг Шарқий қанотини (East Wing) бузиб, ўрнига 400 миллион долларлик улкан базмлар зали қуриш лойиҳаси президентнинг энг устувор режаларидан бири эди. Бироқ суд маъмуриятнинг "бинони яхшилаш ва ўзгартириш" ҳақидаги важларини рад этган.
Судья Ричард Леон президентнинг ваколатларини "ҳаддан ташқари киборлик билан талқин қилиш" деб атаб, АҚШ президенти Оқ уйнинг мулкдори эмас, балки келажак авлодлар учун унинг вақтинчалик омонатдори эканини билдирган. Ҳеч қайси қонун президентга тарихий бинони ўз хоҳишига кўра бузиб, янгилаш ваколатини бермайди. Маъмурият лойиҳани хавфсизлик билан асослашга уринган бўлса-да, суд буни етарлича исботланмаган деб топган.
Мазкур даъво Тарихий меросни сақлаш миллий фонди (National Trust for Historic Preservation) томонидан киритилган эди. Фонд раҳбари Керол Квиллен суд қарорини "Америка халқининг ғалабаси" деб атаган. Унга кўра, бундай йирик лойиҳалар учун албатта Конгресснинг рухсати талаб этилади.
Дональд Трамп суд қарорини "мутлақо нотўғри" деб атаган ва маъмурият тез орада апелляция беришини маълум қилган. Ҳозирча суд фақат хавфсизликни таъминлаш билан боғлиқ зарур техник ишларга ижозат берган, қолган барча қурилиш ишлари номаълум муддатга музлатилган. Экспертларнинг фикрича, ушбу баҳс мамлакат Олий судигача етиб бориши мумкин.
Изоҳлар мавжуд емас