Ўзбекистон, Тошкент - Batafsil.uz. Кеча, 28 декабрь куни, Флоридада ўтган тарихий музокаралар ва Путин ҳамда Трамп ўртасидаги 75 дақиқалик "илиқ" мулоқот натижасида Украинадаги урушни тўхтатиш бўйича келишув лойиҳаси деярли якунига етди. Томонлар вақтинчалик сулҳ эмас, балки можарога узил-кесил нуқта қўйиш зарурлигини тан олдилар.
АҚШ президенти Дональд Трамп дастлаб Владимир Путин билан 1 соат-у 15 дақиқа давом этган "самарали" телефон суҳбатини ўтказган, сўнгра Флоридада Владимир Зеленский билан икки соатлик ёпиқ учрашувда қатнашган. Зеленскийнинг таъкидлашича, тинчлик режасининг 90 фоизи тайёр ва энг муҳими — хавфсизлик кафолатлари бўйича тўлиқ келишувга эришилган.
Трамп Путиннинг позициясини "ажойиб" деб атаган ва Москва тинчликка ҳамда Украинани қайта тиклашга ёрдам беришга тайёрлигини билдирган.
Трамп Зеленскийга вазиятга реал баҳо беришни маслаҳат бериб, кечикиш янада кўп ҳудудлар ва инсонлар йўқотилишига олиб келишидан огоҳлантирган.
Янги хавфсизлик келишувига кўра, Украина хавфсизлиги учун асосий масъулиятни Европа ўз зиммасига оладиган бўлди. Музокаралар ва ислоҳотларни назорат қилиш учун АҚШ томонидан махсус ишчи гуруҳ (Рубио, Кушнер, генерал Кейн) тузилган. Шунингдек, Запорожье АЭСни қайта ишга тушириш масаласи ҳам муҳокама марказида бўлган.
Ҳудудий баҳслар ҳали тўлиқ ечилмаган. Зеленский баъзи мураккаб бандлар бўйича мамлакатда референдум ўтказилиши мумкинлигига шаъма қилди. Трамп эса можаро ҳал этилса, АҚШ ва Россия ўртасида "жуда жиддий" иқтисодий ҳамкорлик имкониятлари очилишини ваъда қилган.
Навбатдаги муҳим мулоқот бугун, 29 декабрь куни бўлиб ўтиши режалаштирилган. Келгуси ҳафталар урушнинг тақдирини узил-кесил белгилаб бериши кутилмоқда.
Аввалроқ АҚШ президенти Дональд Трамп Россия президенти Владимир Путин билан Будапештда режалаштирилган учрашув ўтказилмаслигини маълум қилганди. У бу қарорни Украина билан можарони тўхтатиш бўйича музокараларда олдинга силжиш йўқлиги билан изоҳлаган эди.
Изоҳлар мавжуд емас