Ўзбекистон, Тошкент - Batafsil.uz. Туркманистоннинг Мари вилоятида йирик шохли қорамолларнинг оммавий ўлими қайд этилди. Апрель ойи бошидаги ҳолатга кўра, Туркманқалъа ва Ёлётен туманларида ташвишли ҳолатлар қайд этилган бўлиб, у ерда чорвадорлар номаълум инфекциянинг тез тарқалишига дуч келмоқда.
Маҳаллий аҳолининг сўзларига кўра, касалланган ҳайвонларда тумов, оқсоқлик ва кучли ҳолсизлик кузатилади - моллар оёқда тура олмайди ва кўпинча бир сутка ичида нобуд бўлади. Маҳаллий ветеринария хизматлари юкламани кўтара олмай, антибиотикларни қўллашни тавсия қилади, аммо даволаниш барча ҳолатларда ҳам ёрдам бермайди. Туркманистон расмийлари вазиятга изоҳ бермаяпти, давлат оммавий ахборот воситалари эса содир бўлаётган воқеалар ҳақида ёзмаяпти.
Мутахассисларнинг таъкидлашича, ўлимнинг сабаби ўта юқумли вирусли касаллик – оғиз ва туёқ касаллиги ёки бир-икки кун ичида ҳайвоннинг ўлимига олиб келадиган бактериал инфекция - пастереллёз бўлиши мумкин.
Қўшни мамлакатдаги вазият ўзбекистонлик чорвадорларни ҳақли равишда ташвишга солмоқда. Эслатиб ўтамиз, март ойи охирида республика Ветеринария ва чорвачиликни ривожлантириш қўмитаси Фарғона вилоятида оммавий касалланиш ҳолатлари ҳақидаги миш-мишларни расман рад этганди.
Ўшанда ижтимоий тармоқларда хавотирли хабарлар тарқалгач, бошқарма раисининг биринчи ўринбосари Шуҳрат Жабборов шахсан ўзи Олтиариқ туманини кўздан кечирганди. "Оқбўйра" маҳалласида ўтказилган текширувда чорва моллари нобуд бўлгани тасдиқланмади. Аниқланишича, аҳоли ўртасидаги хавотирнинг кучайишига мамлакат ташқарисидаги ветеринария инқирозлари ҳақидаги янгиликлар - хусусан, март ойининг ўрталаридан бери ҳукумат хавфли инфекцияларга қарши курашаётган Сибир ва Волгабўйи (РФ) да чорва молларининг кенг кўламли мажбурий сўйилиши сабаб бўлган.
Изоҳлар мавжуд емас