Ўзбекистон, Тошкент - Batafsil.uz. Америка Қўшма Штатлари президенти Дональд Трамп Японияга расмий ташриф доирасида бош вазир Санаэ Такаичи билан музокара ўтказди. Суҳбат чоғида Такаичи Трампни Тинчлик бўйича Нобель мукофотига номзод қилиши мумкинлигини маълум қилди.
Учрашувда икки давлат ўртасидаги ташқи савдо, хавфсизлик ва ҳарбий ҳамкорликни кенгайтириш масалалари муҳокама қилинди. Шунингдек, нодир материаллар ва муҳим минералларни етказиб бериш кафолатлари бўйича келишувга имзо чекилди.
Бу келишув Хитойнинг октябр ойида нодир материаллар экспорти устидан назоратни кучайтириши ортидан қабул қилинди. Вашингтон эса бунга жавоб тариқасида Хитой товарларига 100 фоиз бож қўйиш билан таҳдид қилган эди.
Трамп эса Такаичини "қудратли лидерлик" учун мақтаган ва унинг тайинланишини тарихий аҳамиятга эга деб атаган.
Трампнинг Японияга ташрифи унинг Осиё бўйлаб сафарининг бир қисми бўлиб, сафарнинг асосий воқеаси Хитой раҳбари Си Цзиньпин билан учрашув бўлиши кутилмоқда.
Эслатиб ўтамиз, бу йилги нуфузли Тинчлик бўйича Нобель мукофоти венесуэлалик Мария Корина Мачадога топширилган. У мазкур мукофотга "Венесуэла халқининг демократик ҳуқуқларини тарғиб қилиш бўйича тинмасдан фаолият юритгани ва диктатурадан демократияга адолатли ҳамда тинч йўл билан ўтиш учун курашгани учун" муносиб деб топилган.
Изоҳлар мавжуд емас