Ўзбекистон, Тошкент - Batafsil.uz. Ижтимоий тармоқларда тарқалган коронавирусга қарши эмлашнинг инсон геномига салбий таъсири ва онкологик касалликлар хавфини ошириши ҳақидаги маълумотлар тарқалмоқда. Шу боис Санитария-эпидемиология қўмитаси COVID-19 вакцинанинг касаллик келтириб чиқариши ҳақидаги хабарларга муносабат билдирди.
Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Атабековнинг таъкидлашича, қўлланилган вакциналар инсон геномига таъсир кўрсатмайди. Эмлашдан сўнг кузатиладиган ҳарорат кўтарилиши, нафас қисиши ёки юрак уришининг тезлашиши каби ҳолатлар организмнинг табиий реакцияси бўлиб, 2-3 кун ичида ўтиб кетади.
Пандемия даврида дунёда 710 миллион киши касалланиб, 7 миллиондан ортиқ одам вафот этганини инобатга олсак, оммавий эмлаш тадбирлари ўлим кўрсаткичининг кескин ошишини олдини олган асосий омил ҳисобланган.
Мутахассис, шунингдек, тармоқларда вакцина таъсиридан "қутулиш" учун тавсия этилаётган карабаш ва арслонпанжаси каби гиёҳларнинг самарадорлигига ҳам тўхталиб ўтган. Унга кўра, ушбу ўсимликлар тиббиётда нафас йўллари яллиғланиши ёки гормонал мувозанатни тиклаш учун ишлатилса-да, улар вакцинадан кейин ҳосил бўлган иммунитетни йўқ қилиш хусусиятига эга эмас.
Бу каби тавсиялар тиббиётдан йироқ шахсларнинг фикри экани ва фанда ўз тасдиғини топмагани таъкидланган.
Соғлиқни сақлаш вазирлиги фуқароларни фақат расмий ва текширилган маълумотларга ишонишга, асоссиз ваҳималарга берилмасликка ҳамда соғлиқ билан боғлиқ ҳар қандай шубҳали ҳолатда соҳа мутахассислари билан маслаҳатлашишга чақирган.
Аввалроқ ҳам ижтимоий тармоқларда болаларнинг ғайриоддий оммавий касалланиши ҳақида хабарлар тарқалганди. Фойдаланувчиларнинг сўзларига кўра, касаллик мавсумий ЎРВИга ўхшайди, аммо ич кетиш ва қусиш асносида кечади. Баъзи ота-оналар аллақачон касалликни коронавирус мутацияси деб аташган эди. Ўшанда ҳам Ўзбекистон Соғлиқни сақлаш вазирлиги COVID-19 оддий респиратор инфекцияга айлангани, мамлакатда коронавирус билан боғлиқ вазият барқарор эканини айтиб, миш-мишларни рад этган эди.
Изоҳлар мавжуд емас