Ўзбекистон, Тошкент - Batafsil.uz. Кеча президент томонидан қурилишига тамал тоши қўйилган Тошкент яқинидаги янги аэропорт 2029 йилда фойдаланишга топширилиши режалаштирилган. Консалтинг ва бошқарувни Жанубий Кореянинг Incheon International Airport Corp (IIAC) компанияси ўз зиммасига олади.
IIAC корпорацияси билан янги аэропортни эксплуатация қилиш бўйича консалтинг хизматлари кўрсатиш бўйича 24,5 миллион долларлик шартнома имзолангани ҳақида The Korea Herald нашри хабар берди.
Келишув доирасида IIAC келгуси беш йил давомида IT инфратузилмаси, йўловчиларга хизмат кўрсатиш сифати ва хавфсизлик тизимларини ўз ичига олган кенг қамровли консалтинг хизматларини тақдим этади.
Шунингдек, IIAC маҳаллий эҳтиёжларни ҳисобга олган ҳолда аэропорт ва шаҳарни ривожлантириш стратегияларини, жумладан, транспорт қулайлиги, логистика зоналари, шунингдек, тижорат туманлари ва сайёҳлик ҳудудларини ишлаб чиқишни режалаштирмоқда.
Консультация хизматларини кўрсатиш 2027 йил июль ойида, аэропортнинг режалаштирилган очилишидан икки йил олдин бошланиши режалаштирилган.
Эслатиб ўтамизки, IIACнинг Ўзбекистондаги иштироки Тошкентдан бошқа ҳудудларда ҳам амалга оширилмоқда. Бир вақтнинг ўзида корпорация Uzbekistan Airports билан Урганч аэропортини ривожлантириш бўйича давлат-хусусий шериклик тўғрисидаги битимни имзолади.
Изоҳлар мавжуд емас