Ўзбекистон, Тошкент - Batafsil.uz. Ёшлар вазият қурбони эмас, балки ўзгаришларнинг ҳаракатлантирувчи кучи - бу Самарқандда очилган ЮНЕСКО ишлари бўйича миллий комиссияларнинг 12-йиғилишининг асосий ғоясидир. Бугунги кунда дунёда 1,8 миллиард ёшлар мавжуд бўлиб, уларнинг 70 фоизи иқлим инқирозидан хавотир билдирмоқда. Бироқ, ташкилот вакиллари таъкидлаганидек, айнан ёшлар тадбиркорлик, ижтимоий лойиҳалар ва барқарор келажак учун курашда энг катта ташаббус кўрсатади. Бу ҳақда мухбиримиз хабар бермоқда.
Форум ташкилотнинг 43-Бош конференцияси арафасида бўлиб ўтмоқда. Кун тартибидан ёшлар сиёсатини ривожлантириш, инклюзивлик, давлатлар, фуқаролик жамияти ва хусусий сектор ўртасидаги ҳамкорликни мустаҳкамлаш, шунингдек, барқарор ривожланиш масалалари ўрин олган. Йиғилишни ЮНЕСКО ишлари бўйича Ўзбекистон Миллий комиссияси раиси, форум раҳбари этиб сайланган Гаяне Умерова очди.
Иштирокчилар ёшлар ташаббусларини қўллаб-қувватлаш бўйича ўз тажрибалари билан ўртоқлашди. Беларус вакили Наталя Шаснович "Барқарор ривожланишнинг ёш элчилари" лойиҳаси ва мамлакат Миллий Ассамблеяси ҳузуридаги Ёшлар парламенти ёшлар сиёсати соҳасидаги қонун лойиҳаларини ишлаб чиқишга кўмаклашиши ва жамоатчилик ташаббусларини қўллаб-қувватлаши ҳақида сўзлаб берди.
Фаластин миллий комиссияси вакили Жиҳод Рамадан вайронагарчиликлар туфайли 600 мингдан ортиқ мактаб ўқувчиси дарсларга кела олмаётган, ҳалок бўлганларнинг тўртдан бир қисми болалар ва ёшлар бўлган Ғазодаги вазият ҳақида маълумот берди. Унинг таъкидлашича, оғир шароитларга қарамай, фаластинликлар таълимнинг кучи ва инсон руҳининг келажакдаги ғалабасига ишониб, "вайроналар ва чодирлар орасида" ўқишни давом эттирмоқда.
Йиғилиш якунлари ва таклифлари ЮНЕСКОнинг 43-Бош конференциясида тақдим этилади ва ташкилотнинг янги стратегик ҳужжатлари таркибига киради.
Аввалроқ Самарқандда бўлиб ўтган ЮНЕСКО ёшлар форуми иштирокчиси, БМТнинг Швейцариядан вакили Марта Сарагоса Наварро Batafsil.uz мухбири билан суҳбатда айнан янги авлод иқлим мавзусини жаҳон кун тартибининг биринчи даражасига олиб чиққанини таъкидлаган эди. Унинг сўзларига кўра, ёшлар учун атроф-муҳитга ғамхўрлик қилиш шунчаки тренд эмас, балки омон қолиш ва келажак масаласидир.
Эслатиб ўтамиз, 27-28 октябрь кунлари ЮНЕСКОнинг 14-Ёшлар форуми бўлиб ўтди. Унда иқлим муаммолари ва уларнинг жамият, айниқса, ёшлар учун ижтимоий оқибатлари муҳокама қилинди. Унинг иштирокчилари стартаплар ва лойиҳаларни тақдим этдилар, шунингдек, ташкилотнинг Бош конференциясида тақдим этиладиган Youth Forum Outcomes якуний ҳужжатини тайёрлашди. Ўзбекистон ёшлари ҳам ўз ғояларини илгари сурди.
Изоҳлар мавжуд емас