Ўзбекистон, Тошкент - Batafsil.uz. Чиқинди хизматларидан қарздорлиги бўлган жами 198 858 та абонентнинг электр энергияси учун тўловларни амалга ошириши вақтинча чеклаб қўйилди. Чиқиндиларни бошқариш ва сиркуляр иқтисодиётни ривожлантириш агентлигининг маълум қилишича, ушбу чора республика бўйича тўланмай қолган 15,8 миллиард сўмлик қарздорликни бартараф этиш мақсадида кўрилган.
Агентлик маълумот беришича, 5 февраль ҳолатига кўра 1 миллиондан ортиқ абонент қарздорлик ҳақида SMS орқали огоҳлантирилган ва уларга тўлов учун 5 кун муддат берилган. Мазкур муддат ичида 12,7 миллиард сўмлик тўловлар амалга оширилган бўлса-да, қарзини ёпмаган истеъмолчиларга нисбатан чекловлар кучга кирган.
Ушбу тартиб 2025 йил 1 июлдан кейин юзага келган қарздорликларга тааллуқли бўлиб, тўлов тўлиқ амалга оширилган заҳоти чекловлар автоматик равишда бекор қилинади.
Аммо бугун Рақобат қўмитаси асоссиз қарздорлик сабабли фуқароларнинг электр энергияси тўловларига киритилган чекловларни қайта кўриб чиқиш юзасидан Чиқиндиларни бошқариш агентлигига расмий сўров юборганди. Бунга сабаб сифатида 2026 йилнинг бошида истеъмолчилардан келиб тушган 850 дан ортиқ шикоятлар кўрсатилмоқда.
Чунки бир қатор ҳудудларда чиқиндиларни олиб чиқиб кетиш графиги бузилган, шунга қарамасдан қарздорлик ҳисобланган. Қўмита Вазирлар Маҳкамасининг 95-сонли қарорига мувофиқ, хизмат кўрсатилмаган ёки сифатсиз бажарилган тақдирда истеъмолчи тўловдан озод этилиши шартлигини айтган эди. Шу асосда бундай вазиятларда электр токига тўлов қилишни чеклаш ноқонунийдир.
Изоҳлар мавжуд емас