Ўзбекистон, Тошкент - Batafsil.uz. Россия Давлат думаси мигрантлар мамлакатга кириш ёки ишлаш ва яшаш учун рухсат олишда тез-тез фойдаланадиган ноқонуний миграция ва сохта тиббий маълумотномаларга қарши курашишга қаратилган қонун лойиҳалари мажмуасини маъқуллади.
Жиноят кодексига киритилган янги ўзгартиришларга кўра, хавфли ва юқумли касалликлар йўқлиги тўғрисидаги сохта маълумотномаларни қалбакилаштириш, ўтказиш ва сотиб олиш учун янада қатъий чоралар белгиланмоқда. Масалан, бир гуруҳ шахслар томонидан интернет орқали ёки хизмат мавқеидан фойдаланган ҳолда бундай ҳужжатларни сотиш ёки сотиб олиш 3-6 йилга озодликдан маҳрум қилиш ва 2 миллион рублгача жарима билан жазоланади.
Агар ҳаракатлар оммавий касалланишга олиб келган бўлса, жазо 4-8 йилгача озодликдан маҳрум қилиш ва 3 миллион рублгача жаримага оширилади. Таққослаш учун, ҳозир шунга ўхшаш жиноятлар учун кўпи билан 2 йил қамоқ жазоси кўзда тутилган.
Ўзгартиришлар тиббиёт ташкилотларига ҳам тегишли. Улар мигрантларнинг тест натижаларини электрон имзо билан тасдиқлаб, бир кун ичида Соғлиқни сақлаш вазирлигининг рақамли реестрига юклашлари шарт. ИИВ ва Роспотребнадзор ушбу маълумотлардан хавфли касалликлар аниқланган хорижликларни зудлик билан чиқариб юбориш учун фойдаланиши мумкин бўлади.
Аввалроқ Россияда меҳнат мигрантлари текшириладиган касалликлар рўйхати кенгайтирилиши ҳақида хабар берилганди. Ҳозирги вақтда мажбурий текширувлар сил, сифилис, жинсий йўл билан юқадиган инфекциялар, ОИВ ва гиёҳванд моддаларга мойилликни ўз ичига олади.
Изоҳлар мавжуд емас