Ўзбекистон, Тошкент - Batafsil.uz. Бухорода 25 сентябрда амалга оширилган операция натижасида синглиси вафот этган аёлнинг опаси ижтимоий тармоқларда қатъий эътироз билдирди. Унинг фикрича, операция зарур тиббий таҳлил ва текширувларсиз амалга оширилган ва бу ҳолат тиббий стандартларнинг қўпол бузилишига олиб келган.
Вафот этган аёлнинг опаси ўз Instagram саҳифасида ёзишича, операциядан олдин қон таҳлили фақат икки соат олдин олинган ва гемоглобин даражаси 6–7 ни ташкил қилган. Бу жуда паст кўрсаткич бўлиб, бундай ҳолатда операция ўтказиш мутлақо хато. Шунингдек, сийдик таҳлили, ЭКГ ва қон ивиш даражаси ҳам текширилмаган.
Операциядан сўнг аёлнинг аҳволи оғирлашган ва жарроҳ унинг қон қуйишини ўз хусусий клиникасида амалга оширган. Бу жараён давомида беморда оғир асоратлар юз берган — буйрак фаолияти тўлиқ ишдан чиққан. Сўнгра бемор Бухоро шаҳар шифохонасига олиб борилган, аммо унинг ҳаётини сақлаб қолиш имкони бўлмаган.
Мазкур ҳолат юзасидан жарроҳ Атавуллаев ҳам ўз Instagram саҳифасида маълумот берган: " ҳозирча видео ва фактлар тўпланмоқда, шундан сўнг тўлиқ расмий изоҳ берилади". Унинг баёнотида, у масъулиятдан қочмаслигини, лекин ўз шаъни ва номига доғ тушишига йўл қўймаслигини таъкидлаган.
Тармоқ фойдаланувчилари эса аввал бу шифокордан жабр кўрганини ва блогер, қўшиқчи Рухшона рекламасига ишониб боргани хато эканлигини тан олишган. Ҳозирча расмий идоралар томонидан изоҳ берилгани йўқ.
Аввалроқ хабар берилганидек, Тошкентдаги хусусий клиникада ринопластика жараёнида тўққиз ёшли бола вафот этган. Операциядан бир ҳафта олдин бола тиббий кўрикдан ўтган ва жарроҳлик амалиётига рухсат берилган бўлса-да, 25 август куни ўтказилган ринопластикадан сўнг у операция хонасидан тирик чиқмаган.
Изоҳлар мавжуд емас