Ўзбекистон, Тошкент - Batafsil.uz. Сурхондарё вилоятида суд собиқ профилактика инспекторини уч ёшли боланинг ўлимига сабаб бўлган лоқайдлиги учун айбдор деб топди.
Фожиа жорий йил май ойида Денов туманида содир бўлган. Маълумотларга кўра, руҳий касалликдан азият чекувчи аёл уч ёшли қизалоққа пичоқ билан ҳужум қилиб, уни ўлдирган.
Суд маълумотларига кўра, ўтган йил октябрь ойида мазкур аёл телефон ўғирлаганлиги учун унга нисбатан жиноят иши қўзғатилган. Суд-психиатрия экспертизаси унда шизофрения белгилари билан кечувчи қаттиқ психотик бузилиш мавжудлигини аниқлаган.
2025 йил 20 январь куни Узун туман суди аёлни мажбурий даволаш учун Республика ихтисослаштирилган руҳий соғлиқ марказининг Сурхондарё филиалига юбориш ҳақида қарор қабул қилган. Қарорни ижро этиш вазифаси Денов тумани ички ишлар бўлимига юклатилган.
Бироқ профилактика инспектори ушбу қарорни ўз вақтида ижро этмаган. У аёлни шифохонага жойлаштириш чорасини кўрмаган, уни гўё “қариндошлариникида” деб ҳисоблаб, бошқа ишлар билан банд бўлганини баҳона қилган.
Айнан ана шу бефарқлик оқибатида 1 май куни аёл бозордан пичоқ сотиб олиб, қизалоққа ҳужум қилган. Болани шифохонага етказишган, аммо у вафот этган. Орадан вақт ўтиб аёл ўз жонига қасд қилган.
Суд жараёнида собиқ инспектор айбини тўлиқ тан олди ва қилган хатти-ҳаракатларининг оқибатини фақат фожиадан сўнг англаганини маълум қилди.
Сариосиё туман суди ушбу фуқарони Ўзбекистон Республикаси Жиноят кодексининг 207-моддаси 3-қисми "а" банди (одам ўлимига сабаб бўлган хизматдаги лоқайдлик) бўйича айбдор деб топди. Суд унга 3 йил озодликни чеклаш жазосини тайинлади ҳамда 2 йил 6 ой мобайнида Ички ишлар органларида ишлаш ҳуқуқидан маҳрум этди.
Изоҳлар мавжуд емас