Ўзбекистон, Тошкент - Batafsil.uz. Тошкент халқаро аэропортида Истанбулга учиб кетмоқчи бўлган икки нафар аёл жами 410 грамм оғирликдаги тилла тақинчоқларни ўз танаси ичига яширган ҳолда божхона чегарасидан олиб ўтмоқчи бўлганида фош этилди.
"Тошкент халқаро аэропорти" чегара божхона пости ва Давлат хавфсизлик хизмати ходимлари ҳамкорлигида ўтказилган шахсий кўрик давомида гумонлар ўз тасдиғини топган. Ўзидан "жонли контейнер" сифатида фойдаланишга уринган йўловчиларнинг бири 252 грамм, иккинчиси эса 158 грамм тилла буюмларини жинсий аъзоларига яширганлиги аниқланган.
Бундан ташқари, ҳуқуқбузарларнинг қўл сумкаларидан ҳам божхона назоратига тақдим этилмаган 64 грамм оғирликдаги заргарлик буюмлари топилган. Дастлабки ҳисоб-китобларга кўра, мусодара қилинган тиллаларнинг умумий қиймати 720 миллион сўмни ташкил этмоқда.
Мутахассисларнинг таъкидлашича, бундай усул аёллар саломатлиги учун ўта хавфли бўлиб, ички аъзоларнинг шикастланиши, қон кетиши ва инфекция тушишига сабаб бўлиши мумкин эди. Сўроқ давомида йўловчилар қиймати қарийб 60 минг долларга тенг бўлган бу товарлар ўзларига тегишли эмаслигини билдиришган.
Ҳозирда мазкур ҳолат юзасидан божхона текширув ҳаракатлари давом эттирилмоқда.
Бундан олдин ҳам Тошкент халқаро аэропорти божхоначилари бир нечта ҳолатда жами қиймати қарийб 2,3 миллиард сўмлик тилла буюмларни яширинча олиб ўтишга уринган шахсларни тўхтатиб қолганди. Давлат божхона қўмитаси хабарига кўра, ҳуқуқбузарлар қимматбаҳо буюмларни кийимлари ва юклари ичига устамонлик билан яширишга ҳаракат қилишган эди.
Изоҳлар мавжуд емас